ABALINGISI abazakhele udumo kwiSibaya, uLinda Mtoba noThandeka Qwabe, bazobonakala emdlalweni okhuza ibuya, iSifiso. UThandeka waseShowe ubelingisa indawo kaThanda obejola noBhekumuzi (Melusi Mbhele) kuthi uLinda ubenguZama Ngwenya obejola noJabu Zungu (Pallance Dladla).
Ngokwesitatimende esithunyelwe kwabezindaba, uLinda uzolingisa indawo kaNokwanda, okuyintombazane ozohlukumeza impilo kaBazothini (Nelisa Mchunu).
NgeSeason edlule uJulia (Zinhle Mabena) utshele uSboniso (Melusi Yeni) ukuthi nguBazothini obulale umkakhe nodadewabo, uNobuhle (Mbalenhle Mthembu). UBazothini uphendule amatafula ngokuphendukela uJulia, okwenze uSboniso acabange ukuthi wuJulia ongumbulali.
UBazothini uqhubeke lapho egcine khona ngokuphusha uJulia ezitebhisini njengoba enza nakuNobuhle. Inkathi eyedlule iphela uBazothini esekhomba ngophakathi, inkinga kungumyeni wakhe, uMhlengi.
Ngakho izibukeli azindele ukwazi ukuthi izogcina izale nkomoni.
Ongumqondisi weziteshi zakuleli kwiM-Net, uShirley Adonisi, uthe bayaziqhenya ngokubuyisa iSifiso, okuwubufakazi bezinga lokuxoxwa kwezindaba abahlale belilindele.
"Sesijahe kabi ukubona okuzokwenzeka kule season nokuthi izibukeli zizokwamukela kanjani okuzokwenzeka," kuphetha uShirley.