ZILOKHU ziqhubeke njalo izigigaba zeReal Housewives Of Durban okuyisizini yesibili yayo.
Isiqephu sesihlanu esiphume izolo naso asibanga nakuthula njengoba kuqale ngokuthi uLondie London, u-Annie noJojo bebuyekeza inkulumo kanina kaNonku, uNkk Williams.
UNonku uzwakalise ukuphatheka kabi ngokushiwo ngonina.
UJojo uthe unina kaNonku uyohlezi enje ngenxa yamazwi akhe awasho ethi muhle ukubedlula bonke.
UThobile ubehlangene noNonku eMhlanga nokubukeka sengathi bazoba ngabangani. Bebedingida isithembu uThobile akusona.
Izintokazi zibuye zahlangana emcimbini weHalloween obusemzini wesiqumama, uSorisha Naidoo.
Njengenjwayelo izintokazi zifike ziswenke ziconsa ukuhambiselana nengqephu, kanti obukeke eshiye abaningi bebambe ongezansi ngengqephu yakhe uLondie London.
ULondie ubegqokise okwasathane waze wanameka ngisho izimpondo ekhanda.
Ekufikeni kwakhe uLondie ubashiye bonke bemangele, uLa Conco waze walandelwa amakhamera ekhexile.
UThobile akazixakanga njengoba efike eziswenkele ngengubo e-pink, uze wahamba kuqala ngoba ethi kukhona la ephuthuma khona.
U-Annie ubuze uLa Conco ukuthi bahlanaphi nowayenguMengameli wezwe, uJacob Zuma, waphendula ngokuthi bahlangana emcimbini.