ABATHANDI bomdlalo owuchungechunge kuMzansi Magic, iDiepCity, bazwakalise ukudumala kunyamalala intandokazi yabo uSonia Mbele owuZola kulo mdlalo. Ngokomdlalo, uZola ubalekele uMgedeza kulandela ukuthi ebanjiwe ukuthi ubrzaa ukumbulala kodwa kwagcina kufe uKhumo umzala kaMgedeza.
Umqondisi wophiko lweLocal Entertainment Channels kwiDStv, uNomsa Philiso uthe abalandeli bakaZola bangakhathazeki, lo mlingisi akaphumi kulo mdlalo kodwa usazoba khona isikhathi eside.
Uthe kuzofanele bakuqonde ababukeli ukuthi imidlalo yalolu hlobo lwama-telenovela ihlale iguquguquka ukuze ingagcine seyicoba abantu.
"Ama-telenovela ahlale ehambisana nezikhathi futhi aneziqephu ezishintshashintshayo. Isikhathi esiningi kuba nabalingiswa abasha abalokhu bethushuka ngenhloso yesiqephu esithize. Babuye bashiye uma inhloso akade beyizele seyifezekile." Ubuye waveza ukuthi kufanele kuqondwe ukuthi nababambe iqhaza kule ndima yokulingisa babuye baqalaze amadlelo aluhlaza. "Abaphoqelekile ukuhlala emdlalweni owodwa. Ngakho indawo kaSonia yileyo ezolokhu ivela uma kunesidingo sayo," kuphetha uNomsa.
UZola ngomunye wabalingisi abafike baphaphamisa iDiepCity ngenxa yokuba yisigebengu esinogazi. Intokazi eyakhuliswa uyise naye owayeyinkunzimalanga yenswelaboya, uMafioso futhi okunguye owasungula ibhizinisi lokushonisa ngemali. UMafioso wabe eseqeqesha uZola ukuze ahambe ezinyathelweni zakhe. UZola yisimomondiya sentokazi esinganqeni ukuthatha indoda yomuntu kungabindabazalutho kodwa enonya olwesabekayo. Ufike kwiDiepCity kwacaca ukuthi usefikile njengoba eke wazama ukunyakazisa uMgedeza kodwa kwangahamba ngendlela abehlele ngayo ngoba noMgedeza yisigebengu esinamaqhinga.
Le ndawo kaZola iyona ebuyisele uSonia endimeni yokulingisa emuva kweminyaka anyamalala kuyo. Wayegcine elingise emdlalweni owawuthi Blessed ngo-2019. Yonke le eminye iminyaka ubesegxile ekudidiyeleni izinhlelo njengoba ebengumdidiyeli weReal Housewives of Johannesburg.