BABONGA ukunakwa yize sebephumile ohlelweni iBig Brother Mzansi abebekuyona kulo nyaka.
UMakhekhe, Sinaye, Mich, Yolanda noZee basentsheni ebonakale ohlelweni lwakuleli kulo nyaka nokuthe muva nje bamenyezelwa njengamanxusa eziteshi ezehlukene okukhona kuzo iMzansi Magic, Mzansi Wethu, Mzansi Magic Music neChannel O.
Bakhethwe ngegalelo ababe nalo bethatha lolu hlelo belusa phambili, njengoba olwalo nyaka lubalwa nezinye ezenze kahle.
Ekhuluma ngokuqokwa kwakhe uMakhekhe, owayefiselwa abaningi ukuthi aphumelele uthe kufezeke amaphupho akhe njengoba esezobonakala kakhulu ezinhlelweni zethelevishini.
“Ukuba yingxenye yohlelo iBig Brother kuthele izithelo ezinhle empilweni yami. Ukubizwa ngizoba ngomunye wamanxusa eziteshi ezehlukene kwiDStv kusho lukhulu kimi. Lokhu kuchaza ukuthi impilo kumuntu iya phambili futhi kuza okuhle kodwa njengoba injongo ngesikhathi singena endlini kwakuwuthi siwine imali noma kube wukuthi imikhakha yobumnandi esizama ukungena kuyo ibone amakhono ethu bese kuvuleka iminyango efana nalena,” kusho yena.
Uthe uyababongela bonke ozakwabo aqokwe nabo, nangangabazi ukuthi bazokwenza into yamehlo kuyona yonke imisebenzi abazonikwa yona.
UYolanda naye owayesemathubeni amahle okudla umhlanganiso kodwa wakhishwa ngemuva kokukhuluma amagama alumelayo uveze ukuthi ujabule ngokunikwa leli thuba njengoba ezoba nesandla ekutheni kukhule iziteshi nazo zonke izinhlelo ezikhonjiswa kuzo.