LIZOSHAYA ngobumnandi bezinga eliphezulu, libe nezilomo zosaziwayo itende leBoomtown elibuya ihlandla lesi-14 emcimbini womjaho wamahhashi, iHollywoodbets Durban July, ozoba seGreyville Racecourse ngoMgqibelo.
Omunye wabahleli baleli tende, uStuart Blonde, obambisene noJohnie Walker Blonde, uthe bayaziqhenya ngokuthi nakulo nyaka bazokwenza into yamehlo ukujabulisa abantu abazobe besetendeni labo emcimbini.
“Sizoqhubeka nesidume ngakho kusukela saqala ukuba khona kule micimbi eminyakeni engaphezu kwewu-10 edlule, ukujabulisa abantu ngobumnandi bodwa, wukudla okuconsisa amathe neziphuzo zezinga eliphezulu ukuqinisekisa ukuthi abayikhaleli imali yabo,” kusho uStuart.
Uthe kulezi zinsuku ezimbalwa bazobe beqhubeka beqedela izingxoxo namanye amaciko abafuna abe khona ukuzonandisa etendeni labo, waqinisekisa ukuthi okwamanje bayazi ukuthi kuzobe kukhona uK.O, Major League DJz, Kings of The Weekend, Ms Cosmo, Ten Oceans, Goldmax, Shilly Mingz, DJ Hands, Delvin noMaglera ozobe eqala ukunandisa etendeni labo.
Amathikithi okuba kuleli tende abiza kusuka kuR650 kuya kuR3 652 umuntu emunye kanti kuzovulwa kusuka ngo-11 ekuseni kuya ku-10 ebusuku.