KUSUKELA yafika eNingizimu Afrika ngo-2022, inhloko yabaqeqeshi kwi-Orlando Pirates, uJose Riveiro, isikukhombise amahlandla angaphezulu kwamabili ukuthi iwuhlobo lomuntu oluchazekayo uma abezindaba beshayisana ngamakhanda.
Kulezi zinsuku ayikho indaba ekhulunywa abaxhumene nePirates njengeyokusondela kwezinsuku zokuphela kwenkontileka yalo mqeqeshi odabuka eSpain, okuzokwenzeka ezinyangeni ezimbili ezizayo.
Ngeledlule, indaba yekusasa likaRiveiro iqongiswe yizinkulumo zikaMandla Ncikazi oyiphini lakhe, Thapelo Xoki noDeon Hotto bobabili abangabadlali kwiqophamlando lePirates eliqhubekayo kuthelevishini kulezi zinsuku elaziwa ngele-Bucs Camp (The Changeroom).
UNcikazi, Xoki noHotto bazwakalise ukukhathazeka ngongabazane oluqhubeka ngekusasa likaRiveiro.
Ngaphandle kokulala isibili amahlandla amabili kwiBetway Premiership nezinkomishi ezinhlanu aseziwolele iPirates kusukela ngo-2022, uRiveiro akazelwa okuningi ebholeni laseMzansi. Kunalokho waziwa njengomqeqeshi owacwecwayo amazwi akhe uma ephambi kwabezindaba.
Ngendlela azigada ngayo uma esesithangamini nabezindaba, kwesinye isikhathi uze aphahluke azishaye isifuba ngokubancisha ezinoju abasuke bezilindele kuyena.
Izimpendulo zakhe kuleli qophamlando ngesikhathi ebuzwa ngekusasa lakhe zishiye imibuso esikhundleni sokucacisa ngokuzokwenzeka.
“Isigaba esikusona sesizini sikhomba ukuthi kukhona izinkontileka eziphelayo yingakho kungethusi ukuthi wonke umuntu efuna ukuba nolwazi ngekusasa kumbe okuzokwenzeka ngalo,” kusho uRiveiro.
“Empilweni hhayi ebholeni kuphela, izinto zihamba zihambe zifike esiphethweni. Lokhu kudaliwe futhi akusoze kwashintsha.”
Nakuba kungazange kucace kahle obekuqondwe nguRiveiro ngale nkulumo kodwa indlela aqhubeke ngayo ivele yadida nakakhulu.
“Angifuni ukwazi ngokuzokwenzeka kusasa kepha ngifuna ukuqhubeka nothokozela lokhu engithandayo ukukwenza manje njengoba ngisengumqeqeshi wePirates.
“Emkhakheni esikuwona kunzima ukuqagela ukuthi uzobe usebenza kuphi ngenyanga ezayo, ngingasayiphathi eyonyaka ozayo, yingakho ngithi asiqhubeke sijabulele okuhle okwenzeka manje singazikhathazi ngokuzokwenzeka kusasa,” kusho yena.