OMUNYE wabadlali abasha beMamelodi Sundowns ovutha amalangabi nakwiBafana Bafana, uJayden Adams, ukhunjuzwe ngumqeqeshi wakhe uMiguel Cardoso ukuthi akahlukile kangako kulaba abanga nabo isikimu.
U-Adams ojoyine iSundowns ngoJanuwari esuka kwiStellenbosch FC, kunongabazange ngokuthi uzokhipha bani esikimini esivele sigqishe ngabadlali beBafana, ufike eChloorkop kwaba sengathi useneminyaka edlala khona.
UCardoso uxwayise u-Adams emuva kokushaya igoli elinqobise iSundowns ngo 1-0 kwiSekhukhune United ngomzuzu wokugcina we-extra time emdlalweni we-quarterfinal yeNedbank Cup eLucas Moripe Stadium, ePitoli, ngoLwesihlanu.
Bekungelesithathu leli goli ku-Adams alishaye imidlalo ilandelana. Ubhakuzise inethi kweyeBafana yakamuva kaGroup C yokuhlungela iNdebe yoMhlaba ngesikhathi ibhekene neLesotho neBenin ngokwahlukana.
Ngesikhathi ekhuluma nabezindaba ngemuva kokuthi ezakhe zizibekisele indawo kowandulela owamanqamu weNedbank, uCardoso ukhumbuze u-Adams ngombango wendawo adlala kuyona esiswini.
“Ngesikhathi efika kwiSundowns bekusobala ukuthi u-Adams umelwe wumqansa wokwenza kangcono kunabadlali beSundowns abanga nabo indawo ngokwezinga kodwa usecacisile ukuthi unawo amava okuyilwela ngempumelelo le ndawo ayidlalayo,” kusho uCardoso.
“Akekho ongaphika ukuthi u-Adams ufike wangena khaxa kwiSundowns kodwa kumqoka ukuthi akhumbule njalo ukuthi le ndawo adlala kuyona uyibanga nabadlali abaseqophelweni lakhe.
“Lokhu kufanele kumenze akuhloniphe ukuthi uyena okwamanje osanikwa ijezi ngokwazi ukuthi le ndawo agijima kuyona iyinjini yeSundowns, ngakho-ke baningi abakulambele ukudlala kuyona.
“Kukuyena ukuthi aqhubeke esikimini kodwa naye uyazi ukuthi lokhu kulele ekutheni uyena muphi umdlali osesimweni esikahle ukusiza iqembu lifeze izidingo zalo."
ISundowns izobuyela enkundleni ngowomlenze wokuqala we-quarterfinal yeCaf Champions League ne-Esperance Spotive De Tunis yaseTunisia kusasa ngo-3 ntambama eLoftus Versveld, ePitoli.
Elinye iqembu elimele iNingizimu Afrika kwiChampions League, i-Orlando Pirates, izoqala ekuhambeni kuma-quarterfinal ne-MC Alger yase-Algeria kusasa ngo-9 ebusuku.
KwiCaf Confedertion Cup iStellenbosch FC izokwamukela iZamalek yase-Egypt kowomlenzze wokuqala ngoLwesithathu ngo-3 ntambama eCape Town Stadium, eKapa.