NAKUBA umqeqeshi weRichards Bay, uBrendon Truter, ezizwa izigi zabaxhasi abasha kuleli qembu kodwa esikhundleni sokuthi zimethuse zimfaka umfutho ngaphambi kokuqala i-Betway Premiership ne-TS Galaxy ngeSonto ngo-3 ntambama, eKing Zwelithini Stadium, eMlaza.
UTruter uqashwe yiBay ngasekuqaleni kwenyanga edlule kulandela ukuhlukanisa kwayo isigubhukane noVusi Vilakazi, oyihlenge ibhekene nezembe ngesizini edlule.
Lo mqeqeshi waseKapa osayiniswe inkontileka yonyaka ngesivumelwano sokuyelula ngomunye uma izinhlangothi zombili zineme, akaqali ukusebenza kuleli qembu likaJomo Biyela.
“Yebo, angiqali ukusebenza kwiBay kodwa kulokhu kuhlukile ngoba kunabaxhasi abafake izindodla zemali ngakho-ke namehlo maningi kithina,” kusho uTruter kwiSolezwe.
“Ngineme ngabadlali engibafice eqenjini yize ngisaqhubeka nokufaka indlela yami yokwenza kwazise ngithole iqembu ebeligcwele umqondo womqeqeshi odlule,” kuqhuba yena.
Kusukela abaxhasi, iPhakwe Gas, befake u-R100 million ozohlukaniswa amasizini amathathu, iBay iqinise inkambi yayo ngoThabiso Kutumela, Keagan Allan, Siyethemba Sithebe, Siboniso Conco noThabang Sibanyoni, ukubala abambalwa.
UTruter udumile ebholeni laseMzansi ngokuba namaqhinga okuvimba izitha kodwa amaqembu akhe avamise ukuba nezimpawu zokuba buthuntu phambi kwamapali.
Kujwayelekile ukuthi uTruter aqale kahle uma efika eqenjini kodwa kugcine kuba sengathi uhlehla nyova ngokuhamba kwesikhathi.
Irekhodi likaBrekkies kwi-Premiership:
* UTruter ubepheka iBay kusukela ngoJulayi ka-2018 kuya kuSepthemba ka-2019 ngesikhathi isagijima kwiMotsepe Foundation Championship.
* Ufike kwezwakala esigabeni esikhulu esiza iSwallows iqeda endaweni yesithupha kwi-log ngo-2020/2021.
*KwiSwallows wagwema ukushaywa i-Orlando Pirates, Kaizer Chiefs neMamelodi Sundowns kodwa wagcina exoshwa ngoNovemba ka-2021.
*Wanikwa umsebenzi njengebamba kuMaZulu FC kulandela ukuhamba kukaBenni McCarthy, ngo-2022.
*Waqala kahle waze wafaka leli qembu kwi-Top 8. Wagcina enikwa umsebenzi ngokugcwele. Kuthe kusemnandi wakhonjwa indlela.
* Kwaphela inyanga exoshwe Usuthu, waqhamuka kwiSekhukhune United.
* Nakhona waqala kahle kwiSekhukhune wayiqedisa isizini ka-2022/2023 endaweni yesikhomisa kwi-log, wayifaka kowamanqamu weNedbank Cup.
* Emuva kokuhlulwa iNedbank wakhonjwa indlela wehlela esigabeni seMotsepe Foundation lapho epheke khona i-Upington City kwaze kwaba ubuyela kwiBay.