IMamelodi Sundowns izibeke ethubeni lokugwema ezinye izinkunzi zase-Afrika iqeda eqhulwini kuGroup A kwiCaf Champions League.
ISundowns yehlule iTP Mazembe ngo 1-0 wephenathi kaPeter Shalulile ayishaye esiwombeni sokuqala eLucas Moripe Stadium, e-Atteridgeville, ngoMgqibelo ntambama. Lo mphumela ubeke amaBrazilians esicongweni seqoqo ngamaphuzu angu-13. Alandelwa yiMazembe ngawu-10. Womabili la maqembu angene enkundleni evele esezibekisele indawo kuma-quarterfinal. Amaqembu ayisishiyagalombili azogadulisana kulesi sigaba azoqhathwa emasontweni azayo. Komunye umdlalo kaGroup A wamaqembu asephumile, iPyramids yase-Egypt idlale ngokulingana ngo 2-2 neNouadhibou yaseMauritania.
Ngokuqeda esicongweni, iSundowns izoqhathwa nelinye iqembu kwamathathu aqede endaweni yesibili kwamanye amaqoqo. Lokhu kuyibeke ethubeni lokugwema amaqembu asatshwayo ebholeni lase-Afrika okukhona kuwona i-Al Ahly yase-Egypt eqede esicongweni kuGroup D, Asec Mimosas yase-Ivory Coast okuqinisekisiwe ukuthi izoqeda phezulu kuGroup B ngaphambi komdlalo wayo wokugcina neWydad Casablanca yaseMorocco. IWydad idinga ukuwina noma yikanjani ukuze izodlulela kuma-quarterfinal kanye neMimosas. KuGroup C, i-Esperance yaseTunisia kufanele igweme ukwehlulwa yi-Al Hilal yaseSudan namuhla ngo-9 ebusuku ukuze izodlulela kuma-quarterfinal kanye nePedro de Luanda yase-Angola esesicongweni se-log. IPedro idinga ukwehlula i-ES Sahel ukuze izoqinisekisa ukuthi izibeka ethubeni lokugwema izinkunzi zebhola lase-Afrika eziqede eqhulwini emaqoqweni azo.