IKaizer Chiefs ingengcindezi yokugcina umgqigqo eqale ngawo isizini yeDStv Diski Challenge (DDC) ka-2024/2025.
Amakhosi iwona kuphela asaqoqe wonke amaphuzu emidlalweni emithathu yokuqala yesizini. Emidlalweni emibili yakamuva, abuye eselandela ngemuva, agcina eyiwinile. IChiefs yaqoqa amaphuzu amathathu emdlalweni wokuqala wesizini ngemuva kokwehlula iLamontville Golden Arrows ngo 2-0 eThekwini. Emdlalweni wesibili yanqoba ngo 2-1 kwiChippa United ingasaphelele enkundleni. Ngempelasonto ibhaxabule iSekhukhune United ngo 2-1.
IChiefs iqala ngegiya eliphezulu nje, ishaya ngenqwaba yabadlali abasha kulandela ukudedelwa kwabanye nokwenyuselwa kwabanye esikimini seBetway Premiership. Kubadlali abanyuselwe esikimini esikhulu kukhona uDonay Jansen osanda kusayiniswa inkontileka entsha. Ukuhlala esicongweni zibekwa kwabafana bakaVela Khumalo akubuzwa ukuthi kuzonyusa ingcindezi yokuqhubeka nomgqigqo futhi kwenyuse ithemba ngokuphela kweshobolo leminyaka lokwehluleka ukuwina iligi. Selokhu yasungulwa iDiski Challenge ngo-2014, izinkunzi zaseSoweto okuyiChiefs ne-Orlando Pirates, azikade ziyiwine iligi. Amakhosi agcina ngokuwina kabili iDStv Diski Shield okuyindebe eyayidlalelwa ngamaqembu eDiski Challenge.
NgeSonto, iChiefs izoqhubeka nomkhankaso wayo wokuqoqa amaphuzu uma isibhekene neSuperSport United eLucas Moripe Stadium. Nokho kuzomele izibambe ziqine kwazise Amatsatsantsa a Pitori ngelinye lamaqembu asezakhele isithunzi kwiDiski kulandela ukuwina isicoco seligi ngo-2023.
Imidlalo yeDStv Diski Challenge
NgoMgqibelo
Orlando Pirates v Sekhukhune United (Isak Steyl Stadium, 10am); TS Galaxy FC v Golden Arrows (Tsakane Stadium, 10am)
NgeSonto
AmaZulu v Chippa United (King Zwelithini Stadium,10am); Stellenbosch FC v Mamelodi Sundowns (Idas Valley Sports Ground, 10am); Cape Town City v Marumo Gallants (Malta Park Sports Complex, 10am); SuperSport United v Kaizer Chiefs (Lucas Moripe Stadium, 12pm); Polokwane City v Magesi (Old Peter Mokaba Stadium, 12pm)