UMSINGA United ujabulise abantu baKwaZulu-Natal ushaya ngo 2-1 iDondol Stars yaseGauteng, emdlalweni wawo wokuqala wamaqoqo, emidlalo yokuhlunga kazwelonke ye-ABC Motsepe League National, ngoLwesibili ntambama, eHarry Gwala Stadium, eMgungundlovu.
Iqhawe loMsinga kube uThabani Mthembu oshaye womabili amagoli ngokwehlukana kweziwombe.
Bewungafunga ukuthi kudlala owamanqamu enkomishi ngendlela abalandeli boMsinga ebebephume ngayo.
Ngaphambi kwalo mdlalo ka-Group A, iningi belinokuwungabaza Umsinga ngenxa yokufinyelela kwezitha zawo kuma-qaurterfinal eNedbank Cup ngenyanga edlule.
Nakuba ibhola isikhathi esiningi belihlale likwiDondol kodwa bekuthi Umsinga uma uhlasela kuvalwe amehlo.
Bekubhoke yena uMthembu elekelelana noMenzi Madela.
Esiswini ibhodwe beliphekwa uNkululeko Miya obedle ngomjiko oconsisa amathe.
Okucishe kwawubulala uMsinga ukudlalela emuva isikhathi esiningi nokulahla ibhola kalula. Esiwombeni sesibili, womabili amaqembu abuye ngamandla. Kungakapheli sikhathi esingakanani kubuyiwe, unompempe ukhiphe ngekhadi elibomvu isitobha seDondol, uKamogelo Sambo, esidlalise kabi ngaphandle kwebhokisi yena uMthembu.
Into ebonakale isize iDondol ukushaya elokulinganisa kwesesibili, ukusebenzisa abadlali bayo abade phambili.
Nokho abafana bakaMkhoza abaphelanga amandla njengoba bephinde banamathisela enethini elesibili.
Isimo bese sishube ngendlela exakile, zishukana. Unompempe uphinde wakhipha ngekhadi elibomvu iphini lomqeqeshi we Dondol.
NgoLwesithathu, khona eHarry Gwala Stadium, Umsinga uzobhekana neFC Buffalo yaseFree State ngo-12.30 emini. Kweminye imidlalo yangoLwesithathu, iYoung Bafana izodlala ne-Upington City yaseNorthen Cape, ngo-9 ekuseni.
Ngo-3.30 ntambama, uMlambo Royal uzobhekana noMpheni Home Defenders yaseLimpopo.
Kweminye imiphumela yangoLwesibili, ku-Group C, i-Orbit College yaseNorth West ishaye ngo 2-0 uMlambo Royal Cubs waseMpumalanga.
KuGroup B, iYong Bafana yaseWestern Cape, ihlule ngo 1-0 Amavarara ase-Eastern Cape.
Imidlalo eyendulela eyamanqamu izodlalwa ngoLwesihlanu, bese eyamanqamu igijinywe ngesonto enkundleni efanayo.
Womabili azodlala kowamanqamu azongene enkundleni esezibekele indawo kwiMotsepe Foundation Championship yangesizini ezayo.