IMPUMELELO iyamlandela umqeqeshi weMamelodi Sundowns, uRhulani Mokwena, okhale wemuka nomklomelo weDStv Coach of The Month ka-Agasti.
UMokwena wehlule uGavin Hunt weSuperSort United oyiqale kahle isizini ka-2022/2023. Ngo-Agasti, iSundowns iyiwine yonke iimidlalo eyisithupha, yahlala esicongweni se-log yeDStv Premiership. Ishaye amagoli angu-13, yangenelwa ngamabili kuphela.
ISundowns icoshe amaphuzu aphelele kwiSekhukhune United, Kaizer Chiefs, Lamontville Golden Arrows, Chippa United, Richards Bay nakuPolokwane City. UMokwena, osabhiyozela ukuwina kweSundowns emqhudelwaneni we-African Football League (AFL) ngempelasonto edlule, udle umhlanganiso kanye nomdlali wakhe omusha uLucas Ribeiro Costa waseBrazil, okhale wemuka nomklomelo weDStv Premiership Player of The Month ka-Agasti.
URibeiro obuya ekulimaleni, ushaye amagoli amane emidlalweni eyisithupha ngo-Agasti. Ngomunye wabadlali abasha abafike kwezwakala kwiPremiership. Umklomelo weDSTV Premiership Goal of The Month, uhambe noPule Mmodi weChiefs ngegoli alishaye engaphandle kwebhokisi bebhekene neStellenbosch e-Athlone Stadium, eKapa.
Emiklomelweni yePremiership kaSepthemba, no-Okthoba kugiye uMabhuti Khenyeza we-Arrows, okhale wemuka noweDStv Coach of The Month. Ngalezi zinyanga, i-Arrows yehlule iSekhukhune, Chiefs, neCape Town Spurs. Ishaye amagoli amane, yangenelwa elilodwa. Le miphumela ibeke Abafana Bes’thende endaweni yesibili kwi-log yePremiership. UKhenyeza, ongumqeqeshi wokuqala we-Arrows ukuwina lo mklomelo kusukela ngo-2017 udliwa nguClinton Larsen, wehlule uHunt no-Eric Tinkler weCape Town City.
Umklomelo womdlali ovelele ngoSepthemba, no-Okthoba udliwe ngumgadli weSuperSport, uBradley Grobler osebuyele efomini aziwa ngayo. Igoli eliqokwe njengelihle kunawo wonke ngelikaSamir Nurkovic weTS Galaxy, alishaye ekude ngesikhathi behlula iSekhukhune ngo 2-0. Bonke abawinile bazothola u-R7000 uvela kubaxhasi beligi, iDStv.