UKUHLABANA ngomklomelo weReferee of the Season kukanondweba waKwaZulu-Natal, uSikhumbuzo Gasa, kumnyusele ngethemba lokufakwa ohlwini lwabangaphansi kweFifa.
Kulo munxa, le nsizwa yaseMlozane, eZingolweni, iqumbe phansi uqweqwe, u-Abongile Tom osohlwini lweFifa noPhilangenkosi Khumalo.
Emunxeni wabasizi bakanondweba, umhlanganiso udliwe uRomania Phiri ohlule uLalelani Mngadi noCledwine Baloyi. Bekungokwesibili kulandelana uGasa eqokelwa umklomelo wePSL.
KumaPSL Awards ango-2022/23, kwanqoba uMasixole Bambiso.
"Ngizizwa ngibusisekile ngokuhlabana ngalo mklomelo. Nakuba bekunzima, le sizini ingiphathe kahle kakhulu. Ngibonga kakhulu kwiSafa nakubo bonke abangesekile, kuhlanganisa nomndeni wami nakozakwethu kulo mkhakha. Ngizizwa ngigqugquzeleka nokuqhubeka nokwenza umsebenzi ngokuzimisela," kubeka uGasa, owaqala ukufutha impempe ngo-2008, esafunda ngakubo, eSinomusa High School.
Uqhube wathi: "Isifiso sami wukungena ohlwini lonondweba abangaphansi kweFifa. Nami ngifisa ukudlalisa emiqhudelwaneni yomhlaba. Ngelinye ilanga ngizibona ngidlalisa kwiFifa World Cup. Lokhu kusho ukuthi kumele ngibhukule kakhulu kunakuqala. Ozakwethu abafana no-Abongile bayisibonelo. Uma ngibheka lapho ngiphuma khona, ngibona leli phupho lifezeka.“
Kuleli abasohlwini lweFifa, uTom, Akhona Makalima noZakhele Siwela. Phambilini kwakunoVictor Gomez, Jerome Damon, Andile Ncobo nabanye.
Phakathi kwemidlalo enohlonze uGasa afuthe kuyo impempe ngesizini edlule, kubalwa owandulela owamanqamu eMTN8 obuphakathi kwe-Orlando Pirates neMamelodi Sundowns. NgoNovemba unikezwe owezinkunzi zaseSoweto, iKaizer Chiefs ne-Orlando Pirates.
Nyakenye uGasa watshela Isolezwe ukuthi ngaphambi kokuqala kwesiwombe sesibili somdlalo womkhaya, yena nozakwabo bavakashelwa umengameli weFifa, uGianni Infantino, oweCaf uPatrice Motsepe, uqweqwe lukanompempe womhlaba, uPierluigi Collina wase-Italy, usihlalo weChiefs, uKaizer Motaung nezinye izikhulu ezaziseFNB.
Wathi bamncoma ngokuwubamba ngobuchule lo mdlalo okwakugcwele phama kuwo.
Isizini uyivale ngowamanqamu weNedbank Cup onqotshwe yiPirates ishaya iSundowns ngo-2-1 eMbombela Stadium, eMpumalanga. Ubeke amaphenathi amabili.
Kwisizini ka-2023/24, uGasa udlalise ewu-22 seyihlanganiswe yonke imiqhudelwano. Eyeligi ibe u-17, yaba mithathu eyeNedbank, wadlalisa owodwa weCarling Black Label Knockout noweMTN8. Ukhiphe amakhadi aphuzu awu-97 namane abomvu. Ubeke amaphenathi ayisithupha.