KUVELA ukuthi sekusele izinto ezimbalwa uShaun Bartlett aqede konke neVenda FC egijima kuMotsepe Foundation Championship.
Leli phephandaba lithole ukuthi sekuphele amasonto amabili kuqhubeka izingxoxo phakathi kwabaphathi bezindaba zikaBartlett no-Itani Munzhelele, ongumnikazi waleli qembu laseLimpopo.
Iqembu lingene kwiMotsepe Foundation ngemuva kokuthenga isitifiketi seCape Umoya ngesizini ka-2021/22.
Uma kugcina ngokuthi zonke izinto zihambe ngononina, uBartlett uzothatha izintambo kuJohnny Ferreira obanjiswe zona ngemuva kokusula kukaJoel Masutha.
Usule ngemuva kokubhaxatshulwa yiMaritzburg United ngo-5-1 ekuqaleni kwale nyanga.
UBartlett uzithola enganamsebenzi nje, ukhonjwe indlela kwiCape Town Spurs ngenxa yokudliwa emidlalweni eyisikhombisa kulandelana, kwiDStv Premiership.
Nakuba esehambile induku ilokhu iqhubekile njengoba iSpurs isikhishwe zisuka kwiCarling Black Label Knockout Cup, ngaphansi kobuholi bukaSean Connor obanjisiwe. Nakwiligi kuyabheda.
Wuye uBartlett onyusele iSpurs esigabeni esikhulu.
Isolezwe lithole ukuthi bese kuphele isikhathi eside enqaba lo mqeqeshi uma eshelwa ngamaqembu adlala kwiMotsepe Foundation.
Kuthiwa kusize abaphathi bezindaba zakhe ukuthi agcine eyilalela iVenda njengoba ibeka nokuconsisa amathe etafuleni.
Ezingxoxweni kuvela ukuthi uBartlett uzoza noCalvin Marlin ozoba yiphini lakhe.
"Ngendlela izinto ezihamba ngayo, ezinsukwini ezimbalwa ezizayo uBartlett uzobe esesayinile kwiVenda. Sekushoda ukuthi kuvunyelwane ngezinto ezimbalwa.
Okuningi kuvunyelwane ngakho ngoMsombuluko. Uphakamise nokuthi afike noMarlin," kubeka umthombo.
UMinenhle Mkhize ophethe izindaba zikaBartlett akakuvumanga futhi akakuphikanga ukuthi lo mqeqeqeshi uzovumbuka kwiVenda.
"UShaun ungumqeqeshi weqophelo eliphezulu. Amagalelo akhe sonke siyawazi. Akwethusi ukuthi kunamaqembu amaningi agijima kwiMotsepe Foundation amfunayo.
Okwamanje sixoxa namaqembu ahlukene. Alikho esisavumelene nalo. Uma konke sekuqondile sizodedela iqembu elimthathayo lenze isimemezelo ngoba siyawuhlonipha umgomo wezingxoxo," kubeka uMkhize.
Uma uBartlett egcina eqomile kwiVenda uhlalelwe wumsebenzi omkhulu njengoba isanqobe umdlalo owodwa kweyisishiyagalombili.
Idliwe kwemihlanu, yadlala ngokulingana kwemibili.
Kweligcine ukuwudlala lishaywe yiMilford yaKwaZulu-Natal ngo-2-0. NgoMgqibelo lizodlala ne-Orbit College, eRoyal Bafokeng Stadium, eqhwakele ngamaphuzu awu-19.