UMNIKAZI ophinde abe ngumqeqeshi weThekwini Coastal, uLindani "Mantaye" Shezi, uveza isizathu esenze bangayiqala kahle isizini ka-2024/25 kwi-ABC Motsepe League.
Ngempelasonto edlule leli qembu linqobe umdlalo wesibili, lishaya iDrakensberg ngo-2-1 wamagoli kaNkonzo Hlongwa nelikaKhehla Ntinga.
Emidlalweni eyisikhombisa ku-stream B lidliwe emine, ladlala ngokulingana kowodwa. Kwi-log lilele kweyesikhombisa ngamaphuzu ayisibalo esifanayo. UShezi uthe okwenze bangaqala kahle ukuthi iqembu labo lifana nelisha.
"Sidlala ngabafana abasha, iningi labo liselincane, lineminyaka eqala ku-16. Sisabakha isipiliyoni. Bathathu kuphela abangaphezu kweminyaka engu-23. Ebesidlala ngabo ngesizini edlule bahambile. Iqembu lethu lakhelwa ukuvundulula nokupholisha ithalente labafana abancane,“ kusho uShezi.
Uthe sebezobheka ukulwela isicoco sangesizini ezayo.
"Kule sizini ngeke sisakwazi ukuba sembangweni weligi. Ku-stream B kubukeka umhlanganiso uzodliwa uMkhambathi, sewuqoqe amaphuzu amaningi. Sizolwa kahle ngesizini ezayo, iqembu lethu lizobe seliqine ngokwanele."
Uveze ukuthi iCoastal seyisungule u-Under 15, 17. Phakathi kwabadlali abakhiqizwe yiCoastal kubalwa uThabani Zuke noSifiso Mlungwana beLamontville Golden Arrows, Sihle Nduli (Stellenbosch), Langelihle Mhlongo noRomario Dlamini (Richards Bay), Thabo Cele odlala eRussia ukusho abambalwa. Ku-stream B uMkhambathi uqhwakele ngamaphuzu awu-21 emidlalweni eyisikhombisa. Emsileni kuvale iNewcastle All Stars ngamane. Ku-stream A kuhleli phezulu iNjampela ngawu-16, kweyokugcina kube neDlangezwa Hellenic ngamane.
Imiphumela yangempelasonto edlule:
Ku-Stream A: Ulundi 1-1 Umvoti; Midlands 0-0 Mkhumbane; Njampela 1-0 Pioneers; Muzi 2-1 Hellenic; Asande 1-1 Summerfield.
Ku-Stream B: Umsinga 1-0 Umshwathi; KwaMashu 1- 0 Newcastle; Mkhambathi 2-1 Ditlou; Coastal 2-1 Drakensberg; Chess 1-0 Junior Eleven.