USEZAKHELE ugazi kubalandeli beqembu lakhe laphesheya umgadli weBafana Bafana, uBongokuhle Hlongwane, ngokulakhela aphinde alishayele amagoli amqoka.
UHlongwane uphinde waba yiqhawe ngesikhathi elibeka enethini sekuvalwe amehlo iqembu lakhe, iMinnesota United, liguqisa iPortland Timbers ngo 1-0 emdlalweni weMajor Soccer League ngeSonto.
Nasemdlalweni owandulele lona, washaya igoli lokubika bethela phansi iHouston Dynamo ngo 1-0. Le miphumela isisuse iMinnesota ngasemsileni yayibeka endaweni yesithupha kwi-log ngamaphuzu angu-18 emidlalweni engu-13.
Ngaphandle kwala magoli, ubengumvusi wenyamazane kweminye imidlalo, eziqoqela izindondo zokuba ngumdlali ovelele emidlalweni ilandelana.
“Ngibona sengathi sesifikile isikhathi sokuthi ngishaye amagoli ngoba ngesizini edlule ngidlale imidlalo eminingi ngingawatholi futhi ngihluleka nokwakhela ozakwethu amathuba. Ngijabule kakhulu ngendlela engidlala ngayo,” kusho uHlongwane kwi-website yeqembu.
Lo mdlali ofike kuleli qembu laseMelika ephuma kwiMaritzburg United ngasekuqaleni konyaka odlule, ushayele iMinnesota amagoli amabili emidlalweni engu-33 ngesizini edlule. Kule sizini useshaye ayisithupha emidlalweni engu-14.
"Unamagoli amane kwiligi kule sizini namabili kwi-US Open Cup. Uma sesihlanganisa nomdlalo womkhumulajezi sesidlale imidlalo engu-14 kule sizini. Uma ngibheka amagoli asewashayile nginethemba lokuthi uzowashaya angu-25 angithembisa wona ekupheleni kwesizini edlule,” kusho umqeqeshi weLoons, u-Adrian Heath khona kwi-website yeqembu.
UHlongwane nozakwabo oyibamba emuva, uMichael Boxall, baqokelwe eqenjini elihlanganise abadlali abagqamile kuleligi yase-United States of America ngesonto eledlule. UBoxall, odabuka eNew Zealand, naye wake wagijima kwiligi yakuleli, edlalela iSuperSport United kusukela ngo-2015 kuya ku-2017.