UMQEQESHI we-University of Pretoria, uTlisane Motaung, uthi kumele bazisole bona ngokugoqa unyaka bengaqhwakele kwi-log yeMotsepe Foundation Championship.
Ngesonto eledlule amaTuks ayeke ithuba lokungena ku-2024 esesicongweni ngemuva kokubambana ngo-2-2 ne-Orbit College, okuyiyona eqhwakele ngamaphuzu awu-30, emidlalweni ewu-17. EzikaMotaung zikweyesibili ngawu-28.
Emdlalweni wala maqembu ngezakhe eziqale zabona imbobo yepali kodwa zaphinde zavumela izitha ukuthi zishaye amabili.
Ngaphambi kwalo mdlalo bezishaye iMarumo Gallants ngo-2-0.
UMotaung uveze ukuthi ayimphathanga kahle indlela abafana bakhe abadedele ngayo i-Orbit.
"Abadlali bengibatshele kahle ukuthi kumele singene onyakeni omusha siqhwakele. Lokhu bekuzosenza sibuye sihambela phezulu. Sonke sazi kahle ukuthi uma kubuywa kuzoshuba. Empeleni ukubheda sikuqale ngesikhathi sibambana neBaroka emasontweni edlule. Nakulo mdlalo bekumele sinqobe, siyeke inqwaba yamathuba" kubeka uMotaung.
Uveze ukuthi umyalelo wabaphathi bakhe ucacile, bafuna iqembu libuyele kwiDStv Premiership.
"Inhloso yethu wukungena esigabeni esikhulu ngaphandle kokudlala kweyokuhlunga. Uma sifuna lokhu kumele siyeke ukwenza amaphutha angenasidingo. Njengoba sengishilo kuzoshuba uma kubuywa ngonyaka ozayo. Sizoba nesikhathi esincane sokuphumula. Kumele sisheshe sibuyele emsebenzini ukuze siqinise amabhawodi axegayo. Njengoba ngoJanuwari kuzovulwa iwindi lokuhwebelana kumele siqinise izindawo ezithile," kuqhuba uMotaung.
AmaTuks adliwa izembe ngesizini ka-2015/16 esigabeni esiphezulu ngemuva kokuqeda kunombolo-15, afike ahluleka ukusindisa indawo yawo kweyokuhlunga. Ngesizini edlule aqede kwi-log yeMotsepe Foundation Championship kweyisishiyagalombili.
Kweka-2021/22 aqeda kweyesibili, kwagcina kunyuke iRichards Bay.
Ngenxa yokuthi kusukela ngoJanuwari 13 kuya kuFebhuwari 11, kuzobe kudlalwa i-African Cup of Nations (Afcon), e-Ivory Coast, imidlalo yeMotsepe Foundation izoze ibuye ngoFebhuwari 13. AmaTuks abuya ngeMM Platinum.
Emsileni kuyiwe ekhefini kuvale iVenda Football ebambene ngamaphuzu awu-16 neGallants. Kuminyene untshumo njengoba ngaphezu kwabo kunePlatinum City nePretoria Callies ababambene ngawu-17.