UDUMISANI Zuma, owazakhela igama egijima kwiKaizer Chiefs, kuvela ukuthi uthole ikhaya elisha kwi-Indian Super League.
Nakuba kungacaci ngegama leqembu alijoyinile kodwa kusolakala ukuthi usayine kwiJamshedpur okuqeqesha kuyo uMandla “Mleven” Zwane wakuleli owake wadlala kwiFC Porto yesePortugal nakwi-Orlando Pirates. UZwane uneziqu zeCaf A Licence. Umthombo uveze ukuthi uZuma usayine ngesonto eledlule.
Kuthiwa uzolibhekisa kuleliya lizwe maphakathi no-Agasti ukuyolungiselela isizini ka-2024/25 eqala ngoSepthemba 14.
“Impela sekugcine kumlungele uZuma ngemuva kwezinyanga engenaqembu. Kuthiwa leli qembu elimsayinisile libone i-video elithunyelelwe yona lase lichazeka. Uzolifulathela leli maphakathi no-Agasti ukuyoqala amalungiselelo esizini entsha,” kubeka umthombo.
Abanye abadlali bakuleli abake badlala e-India, uCole Alexander owayegijima kwi-Odisha, Sameehg Doutie owadlalela i-Athletic de Kolkata (esiyaziwa nge-ATK) neJamshedpur FC noSibongakonke Mbatha owagijima kwiKolkata.Kubaqeqeshi kukhona uDeshi Bhaktawer owayepheka onozinti kwiKolkata ngo-2014.
UZuma, oyibamba kwesokudla, ngomunye wabachithwe yiMoroka Swallows ngoJanuwari emuva kwesiteleka sabadlali.
Leli phephandaba like labika ukuthi uZuma ufunwa nguClinton Larsen ongumqeqeshi weMagesi engomakoti beDStv Premieship.
Ngaphambi kokujoyina iZinyoni ubedlala kuMaZulu. Wona ayemthathe kwiChiefs adlale kuyo phakathi kuka-2017 no-2022.
Nakuba iSwallows imsayinise ibhedelwa yisimo kodwa ubengelinye lamathemba abalandeli bayo.
Ukudlala ngokuzimisela kukaZuma kuholele ekutheni alenze elakhe ijezi ngaphansi komqeqeshi, uSteve Komphela, asebenza naye kwiChiefs eminyakeni edlule. Ngokuhamba kwesikhathi kuvele ukuthi uthanda impilo yobumnandi. Kunesikhathi lapho iChiefs immise amahlandla amabili. Uhambe kuyo ngesizini ka-2021/22 esadlale imidlalo emithathu kuphela.
UBasia Michaels weQT Sports, ophethe izindaba zikaZuma, ukhale ngokuxineka ngesikhathi ethintwa yileli phephandaba. Kuze kwashaya isikhathi sokushicilela engawuphendulanga nomyalezo athunyelelwe wona.