Mamelodi Sundowns (0) 2
SuperSport United (0) 0
AKUBANGA nazihibe ngesikhathi iMamelodi Sundowns iqala indlela yayo yokuvikela i-MTN 8, ngesikhathi inqoba kwiSuperSport United kwi-quarter final yalo mqhudelwano odlalwe ngeSonto ebusuku, eTuks Stadium, eTshwane.
Kudingeke amagoli kaMarcelo Allende no-Abubeker Nassir, bobabili abebesanda kungena esiwobeni sesibili ukuthi iSundowns ingene esigqokweni uma sekuqhathwa amaqembu azodlala eyandulela eyamanqamu ngoMsombuluko ebusuku.
Lo mdlalo izivakashi ziwuqale ngaphandle kukaRicardo Goss, Thabang Sibanyoni noGrant Magerman, bobathathu ezibaboleke kwiSundowns. I-United bekungokokuqala izobhekana nobengukaputeni wayo, uRonwen Williams obevimbele iqembu lakhe lasekhaya.
Nakuba bekulindeleke ukuthi kusiphuke izidindi umdlalo uqala kwazise bekubhekene omakhelwane, kuze kwaphela imizuzu engu-26 kungazange kubekhona iminyakazo etheni ngaphandle kwethuba laMatsatsantsa elihlule, uBradey Grobler, kade ephakelwe kamnandi u-Iqraam Rayners.
ISundowns ibiliphethe ibhola esiwombeni sokuqala, awekho amabhola ayingozi abevinjwa, uGeorge Chigova, obesezintini zaMatsatsantsa.
Ngomzuzu ka-40, uRayners uthole elakhe ithuba lokubeka iSuperSport ebuhleni kodwa wanqaba uWilliams ngebhola ebelikade ligotshelwe, uGampani Lungu, obeqhamuka ngakwesokudla.
Nakwesesibili isiwombe, iSundowns bekuseyiyona elokhu iqhubeke njalo nokuphatha ibhola kodwa ingeyona kangako ingozi ezintini zikaChigova.
Ngomzuzu ka-63, iSundowns ifake induku yayo entsha yaseChile, u-Allende, othathe indawo kaNeo Maema obese ekhombisa izimpawu zokukhathala.
Lokhu kulandelwe ukungena kuka-Abubeker naye osanda kufika kwiDowns esuka kwelase-Ethiopia, uthathe indawo kaKhuliso Mudau ngomzuzu 68.
U-Allende ubeke iSundowns ebuhleni ngomzuzu ka-80, ezihambela yedwa kulandela ibhola eligotshwe, uThapelo Morena, laceza uShalulile lawela kulo mdlali waseChile.
Ngowokugcina, no-Abubeker ushaye elakhe okuyilona elishayele isipikili sokugcina kwiSuperSport.
Kuthe kungangena leli goli, iSundowns yenza izinguquko eziningi obekucaca ngazo ukuthi inhloso ukudunga umdlalo kwazise ubusuyela ngasemaphethelweni ekubeni iSuperSport ibisifake abadlali abanamava njengo-Abrey Ngoma noThamsanqa Gabuza, ngokwahlukana.
ISundowns isilinde ezoqhathwa naye kowandulela amanqamu phakathi kweKaizer Chiefs, Orlando Pirates naMaZulu FC.