UTHEMBISA ngokungalenzi nakancane iphutha lokweya iCape Town Spurs, uLesiba Nku odlala ohlangothini lwesokudla kwiMamelodi Sundowns.
La maqembu azotholana phezulu koweDStv Premiership ngoLwesithathu ngo-7.30 ebusuku, eLoftus Versfeld Stadium. AmaBrazilians asayinqobe yonke imidlalo eyishumi yeligi aseyidlalile. Anamaphuzu awu-30. Kulesi sibalo aseshaye amagoli awu-20, angenelwa amathathu kuphela.
Ngempelasonto edlule, iSundowns ibambane ngeqanda nePyramids yase-Egypt khona eLoftus kowamaqoqo eCaf Champions League.
Lona bekuwumdlalo wesibili iqhuzuka kwiChampions League njengoba ike yashaywa iTP Mazembe kodlule kulo mqhudelwano.
KwiSpurs khona kubanjwa kuyayekwa njengoba ifa yinduku.
Emidlalweni owe-13 isanqobe kwi-Orlando Pirates kuphela. Isishaywe kwemine kulandelana. Kodlule, ihlulwe omkhaya bayo iStellenbosch ngo-3-0.
Kweminye ikhale ngaphansi kwiRoyal AM, Richards Bay nakwiKaizer Chiefs.
Igcine ukunqoba kuzo eZimnyama, ngoNovemba 1. UNku osedlale ewu-16 kuyona yonke imiqhudelwano, uthe balindele umdlalo onzima kwiSpurs.
"Kuzoba umdlalo onzima, iSpurs izobe ilwela impilo yayo. Nathi ngakolunye uhlangothi sifuna ukuqhubeka nokungahlulwa kweyeligi. Yonke imidlalo siyihlelela ngokufanayo, kasibheki ukuthi sidlala neqembu elikweyiphi indawo kwi-log. Ngeke silenze nakancane iphutha lokweya iSpurs," kubeka uNku. Uqhube wathi amalungiselelo abo ahamba kahle nakuba benenkinga yokuthothana kwemidlalo.
"Inkinga ukuthi sidlala njalo ngemuva kwezinsuku ezintathu. Nakuba kunjalo kodwa umdlalo weSpurs uzofika siwulindele. Sihlale silwela ukuyinqoba yonke imidlalo. Sesiwudlulisile umdlalo wePyramids, yonke imiqondo yethu seyigxile ngokuphelele koweSpurs.“
UNku ucele abalandeli bamaBrazillians ukuthi baqhubeke nokubeseka.
Kuzoba umdlalo wesithathu izintambo zibanjwe uMiddendorp kwiSpurs. Benephini lakhe, uVasili Manousakis, bahlalelwe umthwalo wokuthola amaphuzu amathathu okuqala. UMiddendorp uthathe izintambo kuSean Connor obebambile. Empeleni uqashwe kweseTechnical Director. UConnor ubanjiswe ngemuva kokuxoshwa kukaShaun Bartlett obephikwa imiphumela.
Ngemuva koweSpurs, iSundowns izosalelwa imidlalo emine yeligi ngaphambi kokusonga unyaka. Umlenze wesibili wePyramids ngoLwesibili nemithathu yeligi. OweCape Town City ngoDisemba 24, Moroka Swallows ngoDisemba 27 nowePolokwane City ngoDisemba 30.
ISpurs izosalelwa owaMaZulu ngoDisemba 22, nowomkhaya neCity ngoDisemba 30.