Nhlanhla Sithole noMalibngwe Mdletshe
Cape Town City 2-1 Orlando Pirates
IQINISE izinga lokuzikhipha embangweni wesicoco seDStv Premiership i-Orlando Pirates iguqa kwiCape Town City eKapa ngoMgqibelo emini.
IPirates ingelinye lamaqembu abesethubeni lokubanga isicoco seligi kodwa ukuhlulwa imidlalo emibili kuqala u-2023 (ihlulwe yiSundowns neCity) ikhomba ukuthi ngeke isakwazi ukubamba umgqigqo wokudla ubhedu.
Umdlalo wePirates neCity ushise zibekwa ebhandeni kuyiPirates ebithi ayiyidle iyifele iCapeTown City kubhoke uPule Saleng noDeon Hotto ezinhlangothi zombili phambili.
Ukuhlasela kweZimnyama bekuhlalise abalandeli bayo abebephume ngobuningi babo, ngesinqe esisodwa belizwa linuka emakhaleni, igoli kwazise unozinti weCitizen, noDarren Keets, nabadlali bakhe basemuva bebephunga abadlali bezikaMagebhula kubencane indawo.
Ukuhlasela kweZimnyama ngale ndlela bezikhombisa ukuthi zinenhloso yokuthola amaphuzu aphelele kulo mdlalo ukuze ibanciphise igebe eliphakathi kwazo neMamelodi Sundowns, ezihola phambili kwi-log yeDStv Premiership.
Abalandeli besazibuza ukuthi lizoqhamuka nobani leli goli abalizwe libanukela emakhaleni, uHotto ube esebatshela ukuthi lizoqhamuka naye ngenguzunga yeshodi engaphakathi kancane kwebhokisi elikhulu, labhajwa enethini walizwa ngendaba unozinti uKeet kwaba ngu 1-0.
Emuva kwaleli goli Amabhakhaniya kube sengathi ayahlanya njengoba abeselithunga ezama ukugqobhoza kuzona zonke izinhlangothi. Phezu kwale mizamo yayo nengcindezi ebiyinikeza abadlali beCitizen, kodwa abazange bazithele ngabandayo ngoba bethi sebelandela ngemuva.
Nabo baqhubekile nokuthi uma bethola ibhola bahlasele kube ncane indawo nokuthe nomzuzu ka-31 uJuan Camilo Zapata wangqofela phakathi elokulinganisa, nelimshiye elenga emoyeni uzoninti weZimnyama uSipho Chaine, nokuyiwe ngalo ekhefini zibambene ngo 1-1.
Ngesiwombe sesibili abafana base-Orlando baqhubeke lapho bebegcine khona ngesokuqala kodwa amagoli engavumi. Ukulangazelela ukuthola elinye igoli kwePirates kugqame okwekati elimhlophe ehlungwini, liphakamisa lonke ibhentshi labadlali ukuba bayozifudumeza ukuze balungele ukungena enkundleni.
Ngale sikhathi iCity ibisibuye yonke ukuvala wonke amazibuko emuva njengoba Amabhakhaniya abelokhu ebengamele kuzona zonke izinhlangothi kusukela emuva kuya phambili.
UHotto ubelokhu eyizinyo eliqaqambayo ngasohlangothi lwesokudla emuva kwiCity lapho obekudlala khona ukaputeni wayo uThami Mkhize.
Komunye umdlalo, iSundowns iphinde yadedeleka iLamontville Golden Arrows inquma ngo 2-1 iSuperSport United ngo 2-1 KwaMashu izolo.