INJAMPELA FC izisondeze eduze kwempumelelo yokuzibekisela indawo esigabeni seMotsepe Foundation Championship idlula esigabeni samaqoqo kumaPlay-Offs kazwelonke eSafa ABC Motsepe League abanjelwe, e-Upington.
Leli qembu laKwaZulu-Natal lizifake kweyandulela owamanqamu ngokuguqisa i-FN Rangers yaseWestern Cape ngo 2-1 kowokugcina wamaqoqo eMxolisi Dicky Jacobs Stadium e-Upington, ngoLwesine ntambama.
Amagoli elinqobe ngawo avalelwe phakathi wuNqaba Xulu noLungelo Vilane ngesiwombe sokuqala, eleRangers ebone inethi kuqala livalelwe phakathi wuDarron Omaticus.
INjampela eqede ihlezi phezulu kuGroup A ngamaphuzu amane, yedlulele emzuliswaneni olandelayo weyandulela owamanqamu.
Leli qembu, belize emdlalweni walo neRangers lidinga ukunqoba ukuze liqede isigaba samaqoqo linamaphuzu amane kulandela ukubambana ngo 2-2 neMpheni Home Defenders yaseLimpopo kowokuvula ngoLwesibii.
IRangers evule ngesivuthevuthe ivulela isibhaxu sika 4-1 kwiMpheni ngoLwesithathu nokwenze iMpheni yaphuma ekuseni kule midlalo, ibidinga iphuzu kuphela emdlalweni wayo neNjampela.
Ngaphandle kweNjampela, amanye amaqembu azibekisele indawo kweyandulela owamanqamu yiKruger United yaseMpumalanga eqede iphezulu kuGroup C, Highbury FC yase-Eastern Cape eqede ihlezi phezulu kuGroup B yaphelezelwa yiThames FC eguqise iMangaung United ngo 1-0 kowokugcina wamaqoqo, yabe isiqeda endaweni yesibili kuwona uGroup B ngokuba yiqembu eliqede endaweni yesibili linamaphuzu angcono
Imidlalo eyandulela amanqamu izodlalwa namuhla. Owokuqala ungo-11 emini phakathi kweThames FC neKruger United, owesibili ngo-3 ntambama phakathi kweHighbury FC neNjampela FC.
Amaqembu amabili azophumelela, yiwona azobe esekhushulelwa kwiMotsepe Championship, bese edlala kowamanqamu ngeSonto ngo-3 ntambama ukukhipha umpetha kazwelonke we-ABC Motsepe League.