KUQHILIKA izihlathi kumnikazi woMsinga United, iSouth African Football Association (Safa), ibathola bengenalo icala lokuqhumisa izibhamu ngemuva kokushaywa i-Orbit College yaseNorth West kowandulela owamanqamu ama-ABC Motsepe League National Play-Offs, ngenyanga edlule, eMgungundlovu.
Leli qembu likaMkhokhiseni Mpanza, belibekwe icala lokuqhumisa izibhamu, elokudicilela phansi inkundla nelokungena ngodli kwabalandeli enkundleni.
Indaba yokuqhuma kwezibhamu eHarry Gwala Stadium iye yaduma iNingizimu Afrika yonkana. Kuma-vidiyo ayefakwe ezinkundleni zokuxhumana kwabonakala abadlali ababesenkundleni bebaleka beqa nothango, kuzwakala nomsindo wokuqhuma kwezibhamu.
Ngokwesinqumo esiphume ngoMsumbuluko, AmaBhubesi atholwe engenacala kwelokuqhunyiswa kwezibhamu. Alahlwe ngelokonakaliswa kwenkundla nelokungena kwabalandeli bawo enkundleni.
Abe esehlawuliswa u-R200 000. Nokho lesi samba silengisiwe. Kumele leli qembu lingatholakali linecala elifanayo kuze kuphele isizini ka-2023/24.
AmaBhubesi aphinde agwetshwa ngokuthi emidlalweni emithathu yokuqala yasekhaya ngeke kube nabalandeli.
UMpanza uthe liphume nobomvu ngokunqoba ikakhulukazi icala lokuqhuma kwezibhamu. Uveze ukuthi lokhu bekwakha isithombe esingesihle ngendawo yaseMsinga.
"Indawo yangakithi seyathuthuka ngendlela eyisimanga. Akuseyona eyezimpi. Sesawushiya kudala lowo mqondo. Sishaya ngenqwaba yezifundiswa. Ngijabule kakhulu ngokuthi sitholwe simsulwa ecaleni lokuqhunyiswa kwezibhamu. Kukhona ebesibabona ukuthi bafuna ukuthi sixoshwe kwiligi. Bagilekile, asiyi ndawo," kubeka uMpanza.
Uveze ukuthi uzofaka isicelo sokuthi sihoxiswe isigwebo sokunqatshelwa kwabalandeli emidlalweni emithathu yokuqala eMzisho Stadium.
Uqhube wathi bazobuya ngamandla, bafuna ukubuyela emidlalweni yokuhlungela ukwenyukela kwiMotsepe Foundation Championship. Leli phephandaba lihoshe ukuthi kukhona abadlali abese belishiyile iqembu ngoba besola ukuthi lizixoshwa kwiligi. Ebuzwa ngalokhu uMpanza, uthe: "Ngike ngakuzwa lokho. Engikwaziyo ukuthi sishaya ngenqwaba yabadlali. Sekuphele isikhathi eside beziqeqesha.“