Esperance Sportive (1) 1
Mamelodi Sundowns (0) 0
IMAMELODI Sundowns izithwese ijoka elinzima yehluleka ukuthola igoli ekuhambeni ishaywa yi-Esperance de Tunis yaseTunisia ngo 1-0 emdlalweni womlenze wokuqala wowandulela owamanqamu weCaf Champions League eStade Olympic Hammadi Agrebi, eTunisia, ngoMgqibelo ebusuku.
Igoli enqobe ngalo i-Esperance livalelwe phakathi wuYan Sasse ngesiwombe sokuqala. Yilona elibeka leli qembu laseTunisia ethubeni elingcono lokunqoba kunezimbangi zalo kowomlenze wesibili, ongo-Ephreli 26 eLoftus Versfeld Stadium, ePitoli.
Ukwehluleka kwamaSandawana ukuthola igoli ekuhambeni, sekuyifake ngaphansi kwengcindezi yokuthi nakanjani emdlalweni womlenze wesibili ePitoli, ashaya amagoli amabili bese engayivumeli i-Esperance ithole igoli ukuze akwazi ukwedlulela kowamanqamu.
Lo mdlalo bekungowesibili wowandulela owamanqamu osukwini lwangoMgqibelo. Kuqale kwatholana phezulu iTP Mazembe yaseDemocratic of Republic of Congo (DRC) ne-Al Ahly yase-Egypt, zabambana ngo 0-0, eStade TP Mazembe, eLubumbashi, eDR Congo, ngoMgqibelo ntambama. Nabo bazohlangana emlenzeni wesibili ngo-Ephreli 26, eCairo International Stadium.
Okuqaphelekile esikimini seSundowns esiqale umdlalo ukungabi bikho kwesinye sezethenjwa zaleli qembu, uTeboho Mokoena, owaphuma edonseke umsipha emdlalweni wangoMsombuluko weDStv Premiership neMoroka Swallows.
Odongeni lwasemuva uguquko iqalise uBathusi Aubaas maphakathi nendawo, okuyindawo angajwayele ukuyidlala.
Nokho ngokuqhubeka komdlalo u-Aubaas ugcine eseyibamba enkabeni yenkundla edlala indawo yokuvikela udonga lwasemuva.
I-Esperance icishe yahamba phambili ngomzuzu ka-38 ngenkathi ibhola ebelishaywe wukaGhailene Chaalali lishaye ipali selimdlile unozinti uRonwen Williams, labuya lashaywa wuHoussem Tka kodwa uDivine Lunga wawususa umhlola ekhaya elichiliza ngekhanda selimdlile futhi uWilliams.
Ukuqhubeka nokuhlasela ngamandla kwe-Esperance kugcine kuyinike umvuzo ngomzuzu ka-41 uSasse ephula umgoga we-off side yodonga lwasemuva lweSundowns, waphuma qekele wadlula kuWilliams ngaphambi kokuliphushela enethini kwaba ngu 1-0.
Phezu kokuba ngesiwombe sokuqala iSundowns bekuyiyona ebibukeka ikwazi ukugcina ibhola ukwedlula izitha, kodwa beyihluleka ukugqobhoza udonga lwe-Esperance, kangangokuthi size saphela isiwombe sokuqala unozinti waleli qembu, u-Amanallah Memmiche engavimbanga bhola elinzima.
Lilodwa kuphela ibhola leSundowns ngesiwombe sokuqala elicishe ladla phakathi obekuyishodi elidedelwe uLucas Ribeiro Costa elishaye ipali selimdlile unozinti.
Esiwombeni sesibili uThembinkosi Lorch uhlulwe uhlaba udle webhola wephasi abeyibekelwe wuRibeiro Costa kodwa wakha amabhilidi.
Ngomzuzu ka-58 unozinti we-Esperance ugeze uThemba Zwane obesephunyukile ngemuva komnyakazo omuhle obuqhamuke noLorch. Igoli lasekuhambeni alizange livume kwezikaRhulani Mokwena, umdlalo waze wagcina uphelile.