Young Africans (0) 0
Mamelodi Sundowns (0) 0
IMamelodi Sundowns izibeke ethubeni lokwedlulela kowandulela owamanqamu weCaf Champions League ibambana neYoung Africans yaseTanzania emdlalweni womlenze wokuqala wama-quarterfinal obudlalelwa eBenjamini Mkapa Stadium, eDar es Salaam, ngoMgqibleo ebusuku.
Kulo mdlalo obubhekwe ngabomvu eTanzania, iYanga iyona eqale yahlokomisa inkundla ngesikhathi uClement Mzize ephunyuka ezitobheni zeSundowns ngomzuzu wokuqala kodwa ibhola lakhe laphelela ezandleni zikanozinti uRonwen Williams. Emuva kwalokho, iSundowns iqalile yawulawula umdlalo. Nokho sihlale obala isikhala sikaThemba Zwane ongawudlalanga lo mdlalo kwazise ubedonsa isigwebo samakhadi.
AmaBrazilians aphoqeleke ukwenza izinguquko ekuqaleni kwesiwombe sokuqala ngemuva kokulimala kukaBongani Zungu oshishwe ngohlaka, indawo yakhe yathathwa ngu-Aubrey Modiba kusaphele imizuzu engu-19 kuphela umdlalo uqalile.
Yize womabili la maqembu ewatholile amathuba kodwa iSundowns yiyona ebiphezulu kakhulu ngomdlalo, ihlasela kuvalwe amehlo.
Ngokugwema ukwehlulwa kowomlenze wokuqala, iSundowns izibeke ethubeni elihle lokudlulela kowandulela owamanqamu. Kowomlenze wesibili ozoba ngoLwesihlanu ngo-8 ebusuku eLoftus Versfeld Stadium, ePitoli, iSundowns idinga ukuwina noma yikanjani. IYanga yona izongena enkundleni idinga ukuwina noma idlale ngokulingana okunamagoli ukuze izodlulela kowamandulela owamanqamu weChampions League okokuqala emlandweni wayo.
Khonamanjalo, i-Al Ahly yase-Egypt yehlule iSimba yaseTanzania ngo 1-0 kowomlenze wokuqala ekuhambeni, kwathi i-TP Mazembe yaseDemocratic Republic of Congo (DRC) yabambana ngo 0-0 nePedro de Luanda yase-Angola.
I-Al Ahly yiyona engompetha abavikela isicoco seChampions League esinqobe ngesizini edlule iguqisa iWydad Casablanca yaseMorocco.
Ngesizini edlule iWydad yiyona eyawashisa ijezi iSundowns kowandulela owamanqamu. Lokhu kwenza kubhekwe ngabomvu ukuthi uma kwenzeka la maqembu ephinda edibana kowandulela owamanqamu nakulo nyaka kuyokwenzekani.
Ukuphuma ekuseni kwamanye amaqembu aseMzansi abebambe iqhaza emiqhudelwaneni yeChampions League neCaf Confederation Cup okuyi-Orlando Pirates, Supersport United neSekhukhune United, sekuqongisa ingcindezi kwiSundowns.
Lezi zingqungqulu zasePitoli zinqobe i-African Football League (AFL) ngoNovemba nyakenye. Ziqophe umlando kwazise lo mqhudelwano ubudlalwa okokuqala e-Afrika.