Kaizer Chiefs (1) 2
Casric Stars (0) 1
I-KAIZER Chiefs iqede ishobolo lokukhishwa "ngompushana" kwiNedbank Cup yehlula iCasric Stars emdlalweni weLast 16 eFNB Stadium, eNasrec, ngeSonto ebusuku.
Amagoli eChiefs ashaywe nguCaleb Bimenyimana no-Ashley Du Preez esiwombeni ngasinye. EleCasric lishaywe nguKgomotso Mosadi kwesesibili.
Ngokuwina kwiCasric edlala kwiMotsepe Foundation Championship, iChiefs iqede ishobolo lokukhishwa kwiNedbank Cup ngamaqembu adlala ezigabeni eziphansi osekwenzeke amahlandla ayisithupha selokhu kwasungulwa iPremier Soccer League (PSL). Kula maqembu kukhona neBaroka eyashaya iChiefs isasesigabeni seSafa, i-ABC Motsepe League ngo-2011.
Ngokukhipha iCasric, iChiefs ijoyine amanye amaqembu ayisikhombisa adlulele kuma-quaterfinals okuyiMamelodi Sundowns, Orlando Pirates, Sekhukhune United, Dondol Stars, Royal AM, Stellenbosch neChippa United.
La maqembu azoqhathwa ngoMsombuluko ngo-6 ntambama eRandburg, eGauteng. Ukudlulela phambili kwezinkunzi zeDStv Premiership kuphakamisa amaphaphu kubalandeli ngokuthi zingase zidibane kuma-quartfinal.
Umbuzo osezindebeni zabaningi, uthi yiliphi iqembu elizoqhathwa neSundowns evithiza kwasani okuphambi kwayo kule sizini?
Ukuphumelela kweChiefs kunyusa ithemba lokuqeda isomiso kubalandeli bayo. Enkundleni iyona eqale umdlalo ihlasela iCasric, kubhoke uMduduzi Shabalala noKamohelo Mahlatsi kodwa iphikwa yizinto uma isifike phambili.
Nokho kusheshe kwayilungela ngomzuzu ka-10, ngesikhathi unompempe eyinika iphenathi emuva kokuthi ukaputeni weCasric, uMumuni Abubakar, ebamba ibhola ngesandla ebhokisini. UBimenyimana uyishaye phakathi. Emuva kwaleli goli, iChiefs iqhubekile nokuhlasela kodwa yahluleka ukusebenzisa amathuba.
Esiwombeni sesibili, iChiefs ibuyile yaqhubeka nokulawula umdlalo, yangqongqoza odongeni lweCasric kodwa besingakalapheki isifo sokushweba phambi kwamapali. Ngakolunye uhlangothi akukho okutheni obekukhathaza unozinti weChiefs uBrandon Petersen.
Nokho ngomzuzu ka-61, uMosadi ushayele iCasric igoli lokulinganisa emuva kwephutha elenziwe nguZitha Kwinika emuva. Kodwa injabulo yeCasric isheshe yaphela ngesikhathi uDu Preez evalela phakathi ibhola eligotshwe nguKeagan Dolly kwesokunxele.