IBUKEKA izothatha amehlo abathandi bebhola imidlalo yokuvula isizini ka-2024/2025 ye-Motsepe Foundation eqala kule mpelasonto njengoba kubhekwe kakhulu amaqembu abesembangweni wesicoco seligi ngesizini edlule okubalwa kuwona i-University of Pretoria ne-Baroka FC.
ITuks ne-Baroka baqeda isizini edlule besembangweni oshubile wesicoco seligi ye-Motsepe Championship, bagcina beqede endaweni yesibili neyesithathu ngokulandelana. IMagesi FC yiyona eyagcina idle umhlanganiso, yangena igijima kwi-Betway Premiership ngaphandle kokudlala ama-Play-Offs.
Nakuba la maqembu akwazi ukuthola ithuba lokubanga ne-Richards Bay FC emidlalweni yokuhlungela ukuzibekisela indawo kwi-Premiership kodwa amaphupho awo ashabalaliswa yi-Richards Bay eyayiqede endaweni ka-15 kwi-Premiership.
AmaTuks azovula isizini ekhaya neCape Town Spurs, eTuks Stadium ePitoli, kusasa ngo-3 ntambama.
IBaroka izokwamukela i-Orbit College, eBaroka FC Village, eLebowakgomo, kusasa ngo-3 ntambama. Umdlalo wamaTuks neSpurs kubukeka kuyiwona obhekwe ngabomvu kweyokuvula.
I-Urban Warriors ikhuza ibuya kulesi sigaba seChampionship ngemuva kwesizini iku-Premiership eyayikhuphukele kuyona ekupheleni kwesizini ka-2022/23.
Ikhuza ibuya nomqeqeshi u-Ernst Middendorp, ongumakadebona kwezokuqeqesha okubhekwe lukhulu kuyena ngenxa yamava akhe. UMiddendorp, oqalayo ukuqeqesha kwi-Championship, kubhekwe ukuthi uzokwazi yini ukubuyisela iSpurs kwi-Premiership.
Amanye amaqembu abhekiwe kule sizini, kubalwa iDurban City (ebiyaziwa ngeMaritzburg United) ne-JDR Stars, okungamaqembu aqede isizini edlule endaweni yesine neyesihlanu ngokulandelana kwi-log.
ICity ivule ne-Casric Stars izolo, esilobe lapha ungakatholakali umphumela womdlalo wayo, kanti i-JDR Stars ivula ngomdlalo wasekhaya ne-Upington City, eSoshanguvu Giant Stadium, ePitoli, namuhla ngo-3 ntambama.
Imidlalo yeMotsepe Foundation Championship:
Namuhla - Ngo-3pm:
Leruma United v Pretoria Callies (Lucas Moripe Stadium); Hungry Lions v Kruger United (Suzuki Stadium); Venda FC v Milford FC (Thohoyandou Stadium); JDR Stars v Upington City (Soshanguve Giant Stadium)
Kusasa - Ngo-3pm:
Baroka FC v Orbit College (Baroka FC Village); Pretoria University v Cape Town Spurs (Tuks Stadium)