AYA ngokuya ekhuphuka amathuba okuthi iMamelodi Sundowns iphinde ikhonye kwiHollywoodbets Super League njengoba iqhubeka nokushosholoza kule ligi.
AmaSandawana anenebule iThunderbirds Ladies ngo 13-0 eSisa Dukashe Stadium ngoMgqibelo ntambama.
URhoda Mulaudzi uvalele amagoli amathathu, uBoitumelo Rabale, Salome Kekana noLelona, Daweti bashaya amabili ngamunye, amanye aqhamuka kuNonhlanhla Mthandi, Khunjulwa Mali, Melinda Kgadiete noRegina Mogolola.
Leli qembu lasePitoli lisasesicongweni ngamaphuzu angu-74 emidlalweni engu-27. Lilandelwa yi-University of Western Cape, enamaphuzu angu-60 emidlalweni engu-24.
“Umqeqeshi uhlezi egcizelela ukuthi kufanele siwahloniphe wonke amaqembu esidlala nawo, akukhathalekile ukuthi akuphi kwi-log. Kufanele sizimisele kuyona yonke imidlalo yethu, siqoqe amaphuzu amathathu, senze isiqiniseko sokuthi sishaya amagoli amaningi ukuze sinyuse ukuzethemba kwethu. Konke esikwenze kulo mdlalo besikuyalelwa ngumqeqeshi,” kusho uMulaudzi.
“Ujwayele ukusidonsa ngendlebe asitshele ukuthi wonke amathuba esiwatholayo abalulekile futhi akufanele sizithele ngabandayo. Sifuna ukuqhubeka nomgqigqo emidlalweni esele kule sizini.”
Ukunqotshwa kweThunderbirds Ladies kuqinisekisile ukuthi izoba ngelinye lamaqembu azogawulwa yizembe ekupheleni kwesizini kwazise isasemsileni ngamaphuzu amathathu emidlalweni engu-27.
ILindelani Ladies ihlulekile ukukhuphula isibalo samaphuzu ayo ngesikhathi inqotshwa yi-TS Galaxy ngo 2-1. Leli qembu laseThekwini lisasengcupheni yezembe njengoba linamaphuzu angu-13 emidlalweni engu-27.
Lisele ngamaphuzu amahlanu kwiCity Lads, esadlale imidlalo engu-25.
Imiphumela yemidlalo yeHollywoodbets Super league yangempelasonto: Thunderbirds 0-13 Mamelodi Sundowns, Copperbelt 1-1 City Lads, University of Western Cape 2-0 Durban Ladies, University of Fort Hare 0-4 University of Johannesburg, Royal AM 1-0 Richmond United, University of Pretoria 0-0 First Touch FC, TS Galaxy 2-1 Lindelani Ladies, TUT Matsatsantsa 0-0 JVW FC