UMGADLI weRichards Bay FC, uSomila Ntsundwana, uthi bazibophezele ukuqeda umzuliswano wokuqala wesizini besendaweni engcono kwi-log yeDStv Premiership ukugwema amathonsi abanzi ngomzuliswano wesibili.
UNtsundwana ongomunye wabadlali abamqoka kwiRichards Bay, usho kanjena nje, ezakhe ebezisanda kuqeda ishobolo lemidlalo engu-19 lokungawini ngokushaya iMoroka Swallows ngo 1-0, zibe sezibuyiselwa kwamhlaba yiChippa United zishaywa ngo 2-1 ngoLwesibili olwedlule.
IRichards Bay okumanje isendaweni ka-15 kwi-log ngamaphuzu amahlanu emidlalweni eyisikhombisa, izobuyela ensimini ngokubhekana neTS Galaxy, eMbombela Stadium, eBombela, kusasa ngeSonto ngo-3.30 ntambama.
“Ngingasho ngaphandle kokungabaza ukuthi ukuwina kwethu kwiSwallows kukubuyisile ukuzethemba kithina badlali, njengoba beseseyidinga ngayo yonke indlela iwini nemuva kwesikhathi eside singawini.
“Yize sishayiwe emdlalweni wethu olandelile sishaywa yiChippa kodwa lokho akukakwehlisi ukuzethemba kithina ngoba siwabonile amaphutha emdlalweni wethu neChippa nokwenza ukuthi siye kolandelayo neTS Galaxy sesiwalungisile,” kusho uNtsundwana.
“Siyazi ukuthi siyobhekana neTS Galaxy efana nebhubesi elilimele njengoba ishaywe imidlalo emibili ilandelana ngaphambi kokudlala ngokulingana emdlalweni egcine ukuwudlala neCape Town City.
“Ngakho siyobhekana nabantu abawadinga njengathi amaphuzu, nokusho ukuthi siyobhekana nomdlalo onzima ekuhambeni kodwa esizimisele ngokuwuwina.
“Lo mdlalo sizimisele ukuwulwela ukugcina umgqigqo emidlalweni yethu elandelayo, ukuze sikwazi ukuqeda umzuliswano wokuqala wesizini sisendaweni engcono kwi-log. Ukuqala umzuliswano wesibili wesizini usendaweni embi kwi-log yikho okwenza izinto zibe nzima, nengcindezi ibenkulu,’’ kuqhuba yena.
Ngaphandle kukaNtsundwana osalwela ukushaya igoli lakhe lokuqala kule sizini, abanye abadlali iRichards Bay ezothembela kubona ekwenzeni izinto zenzeke kulo mdlalo wayo neTS Galaxy, kubalwa umdlali wasesiswini omandla ngokuhlasela, uSanele Barns nomgadli uJustice Figuareido.
UFiguareido nguyena oshayele iBay igoli lokuwina ishaya iSwallows ngeledlule, waphinda waba nesandla egolini likaBarns ishaywa yiChippa ngo 2-1. I-The Rich Boyz, esalelwe yimidlalo eyisishiyagalombili ukuqeda umzuliswano wokuqala wesizini, phakathi kwamaqembu esazodlala nawo kule midlalo, kubalwa owePolokwane City, iStellenbosch FC, iCape Town Spurs, i-Orlando Pirates, iRoyal AM neKaizer Chiefs.