XOLILE MPISANE
UKUNQOBA yonke imidlalo yalo kubeke iqembu laseGauteng, iGolden Fireballs, esicongweni esigabeni esiphezulu seTelkom Netball League.
IFireballs iyinqobe yomine imidlalo emzuliswaneni wokuqala odlalelwe e-Olive Convention Centre, eThekwini, kusukela ngoLwesithathu kwaze kwaba wuMsombuluko.
Leli qembu eliphekwa ngu-Elsje Jordaan, liqhwakele kwi-log ngamaphuzu ayisishiyagalombili. Lilandelwa ngompetha, iGauteng Jaguars, enamaphuzu ayisithupha.
IJaguars isahlulwe kanye okwamanje, iguqiswa yiFireballs 43-29, kowomkhaya baseGauteng.
UJordaan uthe imjabulisile indlela ezakhe eziqale ngayo isizini kodwa kukhona akubonile okumele bakulungise ngaphambi kokuthi kuqale umlenze olandelayo.
“Enye yezinto ebesizihlosile kuleli sonto, bekuwukuyinqoba yomine imidlalo yethu. Sikwenzile lokho futhi kuyasijabulisa ukugoduka namaphuzu ayisishiyagalombili,” kusho uJordaan.
“Kuyo yonke imidlalo bengenza izinguquko ezithile ukuze ngibone ukuthi ngobani abalungele ukuqala, ngobani abalungele usuka ebhentshini nabangakwazi ukudonsa umdlalo wonke.
"Luningi ulwazi esilutholile kodwa siyazi ukuthi usemningi umsebenzi osihlalelele. Angigculisekile ngendlela ebesihlasela ngayo, kukaningi lapho siphoqeleke khona ukuthi ibhola siliqale phansi emuva.
"Ngingathanda ukuthi abadlali bethu basemuva bafake ingcindezi enkulu kubagadli beqembu elihlaselayo bese phambili silungisa amaphasi ethu amade namafishane."
Iqembu laKwaZulu-Natal elidlala esigabeni esiphezulu, iKingdom Stars, liqale kanzima ekhaya njengoba linqobe umdlalo owodwa lahlulwa kwemithathu.
Lidliwe yiJaguars ngo-50-35, Free State Crinums ngo-46-42 neSouthern Stings ngo-60-29 , ngaphambi kokuthi liguqise iNorth West Flames ngo-57-52.
Esigabeni sesibili; ompetha i-Eastern Cape Aloes, baqhwakele kwi-log ngamaphuzu ayisishiyagalombili ngemuva kokuyinqoba yomine imidlalo yabo.
Iqembu laKwaZulu-Natal, iKingdom Queens, lisendaweni yesithathu ngamaphuzu amahlanu emidlalweni emihlanu, linqobe emibili, lahlulwa kwemibili ladlala ngokulingana kowodwa.
Lidliwe yi-Aloes ngo-40-38 neMpumalanga Sunbirds ngo-43-29, lathela phansi iWestern Cape Tornados ngo-34-31, neNorth West Diamonds ngo-45-44 ngaphambi kokudlala ngokulingana ne-Eastern Cape Comets ngo-38-38.
Umlenze olandelayo weTelkom Netball League uzokuba seHeartfelt Arena, ePitoli, kusukela ngoMeyi 20.