XOLILE MPISANE
IQEMBU lakuleli le-netball lizoqinisa amalungiselelo alo amaCommonwealth Games ngokudlala uchungechunge lwemidlalo yokuzilolonga ne-England.
AmaCommonwealth azodlalelwa eBirmingham, e-England, kusukela ngoJulayi kuya ku-Agasti. Umqhudelwano we-netball uzodlalwa amaqembu angu-12 akleliswe phezulu emhlabeni.
I-World Netball isanda kudalula ukuthi asekleliswe kanjani amaqembu, elakuleli lisahleli endaweni yesihlanu. Amanye amaqembu ase-Afrika abheke kumaCommonwealth yi-Uganda neMalawi abakleliswe endaweni yesithupha neyesikhombisa.
I-Australia isaqhwakele, ilandelwe ngompetha bomhlaba iNew Zealand, i-England neJamaica balale endaweni yesithathu neyesine ngokulandelana.
IWales, Scotland, Trinidad and Tobago neNorthern Ireland ngamanye amazwe azoba yingxenye yalo mqhudelwano.
Umqeqeshi wama-Proteas, u-Dorette Badenhorst, uthe kuzobasiza ukungcweka ne-England kodwa basazama ukuhlela neminye imidlalo abazoyidlala ngaphambi kokuqala komqhudelwano.
“Abadlali bethu baphesheya bazobuya ngoJuni bese siba nekhempu enkulu yokuzilolonga,” kusho uBadenhorst.
“I-England izovakasha ngoJuni sidlale nayo imidlalo yokuzilolonga eKapa. Bazobe bengekho abadlali bayo abagijima kwiSuncorp League kodwa bazobakhona abadlala kwi-English League.
"Ngemuva kwalokho sizolibhekisa e-United Kingdom lapho sihlela ukudlala khona eminye imidlalo ngaphambi kwamaCommonwealth Games. Sisaxoxisana neWales futhi sibheke ukuphinda sidlale ne-England."
Ukulala emsileni kwiQuad Series ekuqaleni kwalo nyaka ngaphandle kokuwina nowodwa umdlalo kubonise amaProteas ukuthi asabhekwe umsebenzi omkhulu. Noma kunjalo, u-Badenhorst uthe kuyathembisa okwenziwa yiqembu enkundleni.
“Sikwazile ukudlala imidlalo eminingi yize sisabhekene nobhubhane lwe-Covid 19. Sikwazile ukudlala uchungechunge neMalawi ne-Uganda.
"Siphinde savakashela eNorthern Ireland lapho sidlale khona kahle kakhulu, yize besingadlaleli amaphuzu, saphinde sanqoba ne-African Cup of Nations eNamibia.”
Ama-Proteas ahlela ukubamba amakhempu amancane ngezimpelasonto uma isimo sivuma bese ebamba ikhempu ephelele ngePhasika, ngaphambi kwe-Telkom Netball League, ezoqala ngoMeyi.