XOLILE MPISANE
LIZIMISELE ukuqhubeka nomgqigqo omuhle ochungechungeni lweWorld Rugby Sevens iqembu lakuleli lamaSevens njengoba lizobuyela enkundleni eSingapore.
Lo mqhudelwano owagcina ukudlalwa ngesikhathi amaBlitzbokke ewunqoba ngo-2019 uzoba seSingapore National Stadium ngoMgqibelo nangeSonto.
Iqembu likaNeil Powell lisayinqobe yomine imiqhudelwano esidlaliwe kule sizini ka-2021/2022 yeWorld Rugby Sevens.
Lithathe izindebe zokuqala ezimbili eDubai ngasekupheleni konyaka odlule, ngaphambi kokunqoba ezinye ezimbili eSpain ngoJanuwari.
ESingapore umqhudelwano lizowuvula eqoqweni iPool A lapho liqhathwe ne-United States, Kenya neCanada.
“Iqembu belisebenza kanzima emasontweni edlule. Sisadlale kahle kulolu chungechunge kodwa lokho akusho lutho futhi nabadlali bakwazi kamhlophe lokho,” kusho uPowell.
“Sizogxila kakhulu emdlalweni wokuqala eSingapore. Asikaze sidlale kusukela ngasekupheleni kukaJanuwari kodwa kufanele siqale ngomfutho."
Kwenziwe izinguquko ezimbili eqenjini elaliseSpain ngoJanuwari. Owayengumdlali weqembu elincane lamaBhokobhoko, uLubabalo Dobela, uzobonakala okokuqala kumaBlitzbokke, ezovala isikhala sikaJustin Geduld, osalimele edolweni.
UBranco du Preez akakalulami ehlombe. Ukungabi khona kwakhe kuvule isikhala sokuthi uRonald Brown abuyele eqenjini ngengoba yena esepholile lapho ayethinteke khona emlenzeni.
Ukaputeni uSiviwe Soyizwapi ukulungele ukudlala emva kokulimala kwakhe eMalaga ngoJanuwari.
“Kuyajabulisa ukubuya kukaRonald noSiviwe abangabadlali abamqoka kuleli qembu,” kwengeza uPowell. “Ngiyambongela noLubabalo ngokuthola ithuba lakhe.
"Uqale kwi-SA Rugby Sevens Academy ngo-2021 futhi wenza ezibukwayo kusukela ngosuku lokuqala efikile. Angingabazi ukuthi ukulungele ukudlala kuleli zinga."
UDobela uthe izindaba zokufakwa kwakhe esikwatini zifike engazilindele.
“Awuchazeki umuzwa ongifikelile ngesikhathi ngithola ukuthi ngiseqenjini. Ngisanda kushonelwa yilungu lomndeni, ngakho lezi zindaba zingikhuthaze kakhulu,” kusho uDobela.
“Umqeqeshi uthe angikhululeke ngingasabi ukwenza amaphutha ngoba bakhona abadlali abanamava abazongeseka. Lokho kwehlise umthwalo omkhulu emahlombe ami futhi kwangiqinisa nedolo."
Umqhudelwano waseSingapore uzolandelwa ozoba seVancouver, eCanada.
Iqembu lamaBlitzbokke: Siviwe Soyizwapi (ukaputeni), Sakoyisa Makata, Ryan Oosthuizen, Impi Visser, Mfundo Ndlovu, Zain Davids, Christie Grobbelaar, JC Pretorius, Ronald Brown, Selvyn Davids, Lubabalo Dobela, Dewald Human, Darren Adonis.