UVELE eNkantolo yeMantshi eBushbuckridge, esifundazweni iMpumalanga, owesilisa osolwa ngokudlwengula unina wengane yakhe.
Ngokwemibiko evelayo, lo mlisa (25) uhambise ingane kunina lapho ahlala khona endaweni yaseMandela, ngo-7 ebusuku ngoMgqibelo.
Kuthiwa uphinde wabuya ngezintatha zangeSonto, wafica lo wesifazane ehleli nomngani wakhe wesilisa ngaphakathi endlini. Kuthiwa ungqongqoze emnyango waze wawuphula njengoba lo wesifazane engafuni ukumvulela.
“Owesilisa obehleli nalo wesifazane, uphume wabaleka ngesikhathi kungena uyise wengane. Laba bobabili baxabanile, uyise wengane wahlula lo wesifazane ngamandla wabe esemdlwengula,” kusho amaphoyisa ngesitatimende.
Umsolwa ubaleke endaweni yesigameko ngo-4 ekuseni ngeSonto. Owesifazane uvule icala lokudlwengula emaphoyiseni, wathungathwa umsolwa waboshwa khona ngeSonto.