USATHUKILE owesifazane emuva kokuzithela phezu kosana lulahliwe enkundleni yezemidlalo ekwa-P eMlaza esikoleni eSizwakele Primary izolo ekuseni.
UNKK Portia Msimang elandisa Isolezwe ngalesi sehlo, uthe ubezivocavoca njengenjwayelo izolo ekuseni ngezithuba zawo-5, ngesikhathi ezithela phezu kosana obelulahliwe.
Udalule ukuthi ingane etholakele ngeyomfana.
Uthi ngesikhathi egijima uzwe into ebikhala eceleni kwenkundla yebhola wase esondela wathola usana.
Uthe akabange esapholisa maseko ube esebikela omakhelwane ngalolu daba.
"Ngibe sengihamba ngiyohlaba umkhosi komakhelwane, sabiza amaphoyisa. Kodwa agcine engafikanga."
Uthe bawalinde isikhathi eside amaphoyisa baze babona ukuthi kungcono ingane bayiyise emtholampilo kwaD eMlaza lapho ithathwe khona yadluliselwa esibhedlela eMshiyeni.
Uthe basebumnyameni mayelana nokuthi usana lulahlwe ngubani.
Okhulumela amaphoyisa KwaZulu-Natal u-Lieutenant Colonel Nqobile Gwala usiqinisekile lesi sehlakalo, wathi ingane iphuthunyiswe esibhedlela ukuze ithole usizo lwempilo. Uthe kuvulwe icala lokulahla ingane.