KUKHUZWE ulaka lowesilisa obevalele umndeni wakhe ewukhombe ngesibhamu ngesikhathi evulela ngenhlamvu emaphoyiseni abezama ukungenelela.
Lokhu kwenzeke ngeSonto ekuseni ngezithuba zehora lesikhombisa eKlopperpark, eBedfordview.
Kuthiwa lo mlisa ubevimbezele umkakhe nezingane zabo ezintathu emzini wakhe ngesikhathi amaphoyisa ethola umbiko ngalesi simo.
Ngesikhathi efika amaphoyisa ezolamula, lo mlisa uvulele ngenhlamvu ebhekise kuwo kwalimala iphoyisa elilodwa nomngani womndeni abaphuthunyiswe esibhedlela besesimeni esibucayi.
Kubizwe amanye amaphoyisa nomxazululi ozamile ukukhuluma nalo mlisa, ngenhlanhla bazwana. Udedele amalungu omndeni wakhe naye wazinikela emaphoyiseni.
Uboshwe khona lapho wabekwa amacala amane okuzama ukubulala.