Uzokhunjulwa ezinkonzweni ezimbili ezahlukene ngoLwesihlanu eThekwini uBheka Mchunu, obengumsakazi woKhozi FM.
UBheka (45) ushone ngoLwesibili ngemuva kokugula isikhathi kungaziwa ukuthi uphethwe yini.
Ekhasini lakhe lika-Instagram kunamekwe imininingwane yenkonzo yesikhumbuzo ezoba sesontweni i-Ethekwini Community Church, enkabeni yeTheku.
Kuthiwa izoqala ngo-2 emini futhi izobe isakazwa bukhoma ekhasini leNcanda Funerals kuFacebook.
Nalapho ebesebenza khona kuKhozi kuhlelwe eyakhona inkonzo yesikhumbuzo yona okuvela ukuthi izoqala ngo-12 emini kuya ku-3 ntambama.
Imininingwane iveza ukuthi izoba sezindlini zomsakazo eM1 Studios futhi izosakazwa kuFacebook, Youtube nasemoyeni.
Kusuka kuvele izindaba zokushona kwakhe baningi asebedlulise amazwi enduduzo.