NKOSIKHONA CELE
UMasipala waseNkosi Mtubatuba usuqale uhlelo lokuthi iziphathimandla zawo zihambele kuzo zonke izindawo okwenziwa kuzo imisebenzi kamasipala ngenhloso yokuqinisekisa ukuthi konke kuhamba kahle nomsebenzi uqedwa ngesikhathi.
Lokhu kuvezwe yiMeya yawo, uMnuz Mxolisi Mthethwa ngesikhathi eqala umkhankaso wokuhambela izinhlelo ezehlukene zomphakathi owakhele lo masipala.
UMthethwa uthe ukuze intuthuko isheshe ifike emphakathini, babone kubalulekile ukuthi basukume bangahlali emahhovisi, baye ngqo lapho kusetshenzwa khona. Ukholwa wukuthi lokhu kuzosiza nasekutheni kungabi nezinhlelo ezidonsa isikhathi eside ezingapheli.
Ubehambisana neMenenja yakulo masipala, uMnuz Thamsanqa Xulu bahlola nokwakhiwa kwenkundla yezemidlalo eNkombose. Le nkundla izodla uR13 million.
“Sifuna ukuthi uma kunenkinga engaholela ekutheni umsebenzi uhambe ngonyawo lonwabu, sisheshe sazi. Ukuziyela mathupha kuyasiza ngoba sifike sithole umbiko ogcwele nathi sizobonele ngawethu, singatshelwa nje sihlezi emahhovisi,” kugcizelela imeya.
Ithe kubajabulisile ukuthi ukwakhiwa kwale nkundla kuhamba kahle futhi kubukeka yonke into izophothulwa ngesikhathi esibekiwe.
Ngaphandle kwalokhu, uMthethwa uthe uzibonele yena ukuthi ngempela amalungu omphakathi awatholile amathuba omsebenzi njengoba eyingxenye yokwakhiwa kwale nkundla.
UNksz Nokukhanya Msane ongomunye wamalungu omphakathi othole umsebenzi ngokwakhiwa kwale nkundla uthe: "Izinhlelo zalolu hlobo zibuyisa ithemba emphakathini wakithi ngoba zifika namathuba emisebenzi,'' usho kanje.
Imeya ithe kulokoza inhlansi yethemba ngokuthi le nkundla uma seyiphothuliwe izolekelela abantu abasha bangabi wuvanzi futhi bagweme nokungena ebugebengwini.
"Sinxusa umphakathi ukuthi usebenzisane nathi ukuqinisekisa ukuthi amaphrojekthi esiwenzayo ayashesha ukuphothulwa. Lokho umphakathi ungakwenza ngokuthi uwavikele aze aphothulwe,'' kuchaza uMthethwa.
Kuphinde kwahanjelwa nesakhiwo esizolekelela ukufukula ezokuvakasha kule ndawo, iTourism Centre.
Lesi sakhiwo uma sesiphothuliwe kuthiwa ngaphakathi sizoba nendawo yokudayisa nendawo yokudla esezingeni eliphezulu.
Bahambele naseZamimpilo Craft Market lapho okwaqubuka khona umlilo kwathi ababesebenza khona basala dengwane.
Njengamanje kuqhubheka umsebenzi wokulungiswa kwale ndawo oqhutshwa wumasipala ngokubambisana noMnyango wezokuBusa ngokuBambisana nezoMdabu KwaZulu Natal.