NGOLWESIBILI silale ngezindaba ezibuhlungu zokudlula emhlabeni koqweqwe lomlingisi, uConnie Temweka Gabisile Chiume, oshonele esibhedlela iGarden City, eGoli, lapho umndeni dalule ukuthi ushone ngenxa yokugula okumxine isikhashana.
Lolu qweqwe lomlingisi luzalelwe eWelkom, eFree State, ngoJuni 5, 1952. Lugqame kwezokulingisa ngendawo kaStella Moloi olwaluyilingisa emdlalweni owawukhonjiswa kwi-SABC 1, i-Zone 14, ngo-2007 kuya ku-2015, selujoyina i-Rhythm City, lapho lufike khona kwezwakala ngendawo kaMamokete Khuse.
UConnie (72) ngaphambi kokungena ekulingiseni, akuqale ngasekupheleni kwama-70’s, wenze izifundo zobuthishela, waziphothula ngo-1976. Ufundise iminyaka emibalwa, wase eshiya phansi, eseyozinza phesheya kwezilwandle, e-Greece.
Ungenise kwezokulingisa ngendawo kaThembi emdlalweni osihloko sithi Inkom’ Edla Yodwa ngo-1989 nakwifilimu ethi Warriors from Hell ngo-1990.
Uwole inqwaba yezindondo ngegalelo lakhe ekulingiseni, kubalwa eye-Best Actress in a Drama Series neye-Best Supporting Actress kuma-South African Film and Television Awards.
Ngo-2018 uqophe umlando elingisa kwifilimu yaphesheya kwezilwandle eyaba nedumela umhlaba wonke, i-Black Panther, wenza esifanayo nango-2020, kweyesihlabani somculi waphesheya kwezilwandle, u-Beyonce, ethi Black Is King.
Ngawo futhi u-2020 kuya ku-2023, uphinde wenza ezibukwayo kwithelevishini, elingisa indawo kaMam’ Sonto Molefe emdlalweni wakuMzansi Magic osuwaphela, i-Gomora.
Eminye imidlalo yethelevishini namafilimu alingise kukho yi-I Dreamed of Africa, In My Country, Blessers, What Did You Dream?, Seriously Single, Sgudi Snaysi, Yizo Yizo, The Line, A Woman of Color, Mazinyo Dot Q ne-Thula's Vine.
Ushiye emhlabeni izingane ezintathu, nabazukulu abathathu, kanti futhi kuvele nokuthi ubewumngani omkhulu wenye inkakha yezokulingisa, uThembi Nyandeni, aqale ukulingisa naye ngabo-70’s. Kuvele ukuthi uyise udabuka eMalawi, unina owaseKZN.
Okhulumela umndeni wakhe, uPercy Vilakazi, ubonge ukwesekwa abakuthola ebantwini selokhu edlulile emhlabeni, wase edalula ukuthi okuningi kuzocaca kusasa ngemininingwane yokufihlwa kwakhe, aqinisekise ukuthi kuzokwenzelwa eGoli.