UNGQONGQOSHE wezaseKhaya, uDkt Aaron Motsoaledi, uthi baphezu kwemizamo yokuhoxisa imvume kaDkt Nandipha Magudumana yokuhambela amazwe. UMotsoaledi ubekhuluma esithangamini sabezindaba ngoMsombuluko, ememezela ukuthi umdlwenguli, uThabo Bester, usenawo umazisi wakuleli.
UDkt Magudumana waboshwa noBester eTanzania batholwa nenqwaba yezincwadi zokuhambela amazwe eziwumkokotelo. UDkt Motsoaledi uthe babona uDkt Magudumana kufanele aphucwe imvume yokuhambela amazwe.
“Siphezu kwawo lowo msebenzi kodwa sisathola iseluleko sezomthetho ukuze konke kuhambe kahle,’’ kusho uMotsoaledi. UDkt Magudumana kumanje usejele ngamacala okusiza uBester eqe ejele. Usanda kumangaza abaningi efaka isicelo sokuthi ukuboshwa kwakhe nokubuyiswa kwakhe kuleli kuthathwe njengento engekho emthethweni ngoba yena wayethunjiwe.