LUQALE kabi usuku kubagibeli abagingqike netekisi emgwaqweni uR102 ngaseDarnall.
Abezimo eziphuthumayo babizelwe kule ndawo ngombiko wokulimala kwabagibeli ngengozi yemoto eyodwa. Abe-IPSS Medical Rescue bafike kule ndawo bathola itekisi ligingqike lilele ngokhakhayi eceleni komgwaqo.
“Sifike endaweni yesigameko sathola kunabantu abaningi abalimele abanye bebesavaleleke phakathi etekisini. Ngesikhathi kuhlolwa isimo sabo, kutholwe ukuthi ababili bebesesimeni esibucayi kakhulu,” kusho uSamantha Meyrick okhulumela abe-IPSS Medical Rescue.
Abagibeli abahlanu balimele kabi kwathi abayisikhombisa bona bathole imihuzuko emincane. Abalimele balashelwe endaweni yesigameko ngaphambi kokuphuthunyiswa esibhedlela.