Amaphoyisa asephume inqina lokuthungayha uthisha oneminyaka engu-58 osolwa ngokudlwengula ephindelela intombazane eneminyaka engu-13 efunda kwesinye sezikole zamabanga aphansi esifundeni iCapricorn South eLimpopo.
Kuthiwa umfundi wadlwengulwa ephindelelwa phakathi kukaNovemba nyakenye noMashi 7 kulo nyaka:
Ithumbu libhoboke ngoLwesinye omunye uthisha ehambisa umfundi kunina lapho efike khona wagonyuluka ngakho konke.
Umkhuzi wamaphoyisa eLimpopo uLieutenant General Thembi Hadebe useyalele amaphoyisa ukuba asebenzise zonke izinsiza zawo ukuthungatha abophe lo thisha osolwayo.
Kuvulwe icala futhi umsolwa wenze ngathi uya esiteshini samaphoyisa ngesikhathi ehamba ngemoto. Esefonelwa uthe useHammanskraal ngaphambi kokucima iselula.
“Lo thisha osolwa ngokudlwengula umfundi wentombazane kumele athungathwe aboshwe ukuze abhekane nengalo yomthetho. Izingane kumele zikhuliswe futhi zivikelwe abathenjwe ngalokho njengothisha, abavikeli nabazali. Ayikho ingane okumele ibhekane nesenzo esiwubulwane njengalesi,” kusho uHadebe.
Onolwazi olungasiza ukubopha umsolwa ucelwa ukuthi ashayele umseshi uLieutenant Colonel Martin Thema ku 082 451 7155 noma u 08600 10111.
Kwenzeka lokhu nje, uyandlondlobala umkhankaso we #JusticeForCwecwe. Kuthiwa umfundi oneminyaka eyisikhombisa uCwecwe wadlwengulwa esikoleni eMatatiele. Lesi sigameko sivuse ilaka kubantu, osaziwayo namaqembu ezepolitiki.