INHLANZI ishelwe amanzi kubalisa ababili ababoshelwe ukweba amakhebuli kagesi emzileni wesitimela eJacobs, eThekwini.
Laba basolwa babonwe amaphoyisa abesebenza nezinye izinhlaka zezokuphepha abezulazula ngasemzileni wesitimela ngezinyawo eqaphe ubugebengu ngoMsombuluko.
La madoda aneminyaka engu-27 no-28, abonwe egaxe izikhwama emhlane nokuthe uma emiswa eseshwa, kwavundululwa inqwaba yamakhebuli. Isisindo sawo singu-20kg.
Okhulumela amaphoyisa KwaZulu-Natal, uColonel Thembeka Mbele, uthe abasolwa bahlulekile ukuchazela amaphoyisa ukuthi bawathathephi amakhebuli? Babe sebekhalelwa amasongo kaSigonyela.
Baboshwe base begqunywa esiteshini samaphoyisa eWentworth babekwa icala lokutholakala nempahla okusolakala ukuthi yebiwe.
“Amaphoyisa azoqhubeka abheke abasolwa ukuthi abathinteki yini kwamanye amacala okweba amakhebuli namanye amacala eWentworth,” kusho uCol Mbele.
Bekulindeleke ukuthi abasolwa bavele eNkantolo yeMantshi eWentworth izolo.