LUQALE kabi usuku kuthela-wayeka N2 ngaseMthunzini ngoMgqibelo ngenxa yengozi enyantisa igazi.
Abezimo eziphuthumayo ngaphansi kwenkampani i-IPSS Medical Rescue babizelwe ngaseFairbreeze kubikwa ingozi phakathi kwezimoto ezimbili ezincane neloli.
“Sithole isimo sengesihle neze, kunezinsalela zezimoto ezisaphazeke emgwaqeni futhi kukhona nabalimele kabi,” kusho le nkampani ngesitatimende.
Ngesikhathi kuhlolwa isimo, kutholakale abantu ababili abalimele kabi. Laba balashelwe kule ndawo anduba baphuthunyiswe esibhedlela, owesithathu ubesesimeni esibucayi kangangokuba kudingeke aphuthunyiswe esibhedlela ngendiza enophephela emhlani ngosizo lweNetcare 911.
Ngeshwa, bane abantu abatholakale sebephangalele.
Imbangela yengozi kayaziwa kodwa amaphoyisa aluqalile uphenyo kanti umzila walo mgwaqo obheke eningizimu usavaliwe.