KULINDELEKE ukuthi bashayelele isipikili sokugcina aboMbuso nabameli ecaleni lokubulawa kowayengunozinti uSenzo Meyiwa, uma selibuyela enkantolo ngoMsombuluko. Icala libuyela eNkantolo eNkulu ePitoli ngoMsombuluko ekuseni.
UMeyiwa owayeyisilomo se-Orlando Pirates neBafana Bafana, wadutshulwa wabulawa ngo-2014, ekubo kwentombi yakhe engumculi uKelly Khumalo, eVosloorus. Icala lisesigabeni lapho kubangwa khona ukuthi izitatimende zabamangalelwa zokuvuma amacala kufanele yini zamukelwe njengobufakazi.
Abamangalelwa bathi amaphoyisa abaphoqa ukuthi bavume amacala abasayinisa izitatimende ngenkani. Uhlangothi loMbuso lumile ekutheni bawavuma amacala, baze badalula nowayebanike itoho lokusoconga uMeyiwa.
Icala liguqe ngenyanga edlule ukuze kunikezwe izinhlangothi zombili ithuba lokuthi zifake amaphepha ezethulo. Izinhlangothi zombili zase ziqedile ukwethula ubufakazi. Sekufanele batshele ijaji ukuthi bami ngamaphi amaphuzu ezicelweni zabo.