LIGWETSHWE kanzima iphoyisa elilahlwe yicala lokudlwengula usingandodakazi walo.
Leli phoyisa lase-East London livulelwe icala wumalumekazi kamgilwa ngemuva kokuthi unina wengane naye oyiphoyisa oshade nomsolwa ehlulekile ukuvulela umyeni wakhe icala yize ingane imazisile ngalokhu.
Kuthiwa izigameko zokunukubeza ngokocansi zenzeka phakathi kuka-2018 no-2021 ziqala ngesikhathi umgilwa eneminyaka engu-13 ubudala.
Leli cala ladluliselwa ophikweni oluphenya amacala amaphoyisa i-IPID waboshwa kanjalo uSergeant oneminyaka engu-53 ubudala.
Lolu phiko luveze ukuthi umalumekazi kamgilwa uyena olandele inqubo yaleli cala, kwaze kwaba sekugcineni.
Lo Sergeant ugwetshwe iminyaka engu-25 ngecala lokudlwengula neminyaka emihlanu ngamacala amabili okunukubeza ngokocansi. Lezi zigwebo uzozodonsa kanye kanye.
Umkakhe ongunina wengane ugwetshwe iminyaka emihlanu ebhadla ejele noma akhokhe inhlawulo kaR5000 ngokuhluleka wukubika lawa macala esetsheliwe ngawo.