ISIKHUNGO semfundo ephakeme iNyuvesi iKwaZulu-Natal (UKZN), izohlonipha uNgqongqoshe wezokuBusa ngokuBambisana neziNdaba zoMdabu kuzwelonke, uDkt Nkosazana Dlamini Zuma ngeqhaza lakhe ekuthuthukiseni ezempilo.
I-UKZN ithumele isitatimende kwabezindaba ichaza ukuthi uDkt Dlamini Zuma, uhlonishwa nezinye izifundiswa kusukela ngo-4 ntambama ngoNovemba 9, ophikweni oluseWestville, eThekwini.
Abesikhungo bathi uDkt Dlamini Zuma uzohloniswa nge-UKZN Living Legend Award ngeqhaza alibambile ethuthukisa ezempilo esifundazweni nokusungula umtholampilo ePholela. Bathe ngaphandle kwalokho nje, isithangami sizoba yithuba lokucobelelana ngolwazi.
Abanye abazohloniswa nguSolwazi Miriam Adhikari, noSolwazi Malegapuru Makgoba. UDkt Nkosazana Dlamini Zuma uhlonishwa nje, uphinde wangenela umbango wesikhundla sikamengameli we-ANC njengoba kubhekwe engqungqutheleni yokukhetha ubuholi ngoDisemba. Uma ekhethwa kuyosho ukuqopheka komlando wokuthi i-ANC ibe nomengameli wokuqala wesifazane, selokhu yasungulwa.
UDkt Dlamini wake wafunda kulesi sikhungo futhi unomlando onothile wezepolitiki. Bamchaza njengesibonelo esihle nakubantu jikelele. UDkt Dlamini Zuma uyayikazela yiziqu zemfundo njengoba egogodile kwezeZoology and Botany, ezempilo nezeTropical Child Health.