BAZIFAKE obishini abafundi ababili baseGreenfarm Village, eLimpopo abasolwa ngokudayisela ozakwabo amakhekhe anongwe ngensangu, bagula baphuthunyiswa ezibhedlela. Babalelwa ku-20 abafundi abagule kulandela ukudla lawa makhekhe abizwa ngama-space muffin.
Okhulumela amaphoyisa eLimpopo, uColonel Robert Netshunda usiqinisekisile lesi sigameko, wathi amakhekhe asahlolwa amaphoyisa ukuqinisekisa ukuthi afakwe insangu ngempela yini.
Amaphoyisa abophe abafundi babafana ababili abaneminyaka engu-16 abasaphekwa ngemibuzo.
“Sesibakhululile abafana kodwa sisaphenya ngalolu daba,” usho kanje.
Noma amaphoyisa esebadedelile abasolwa ngalesi sigameko, kodwa iphephandaba lansuku zonke iSowetan libika ukuthi umphakathi usafuna bathathelwe izinyathelo ezinqala.
Kubikwa ukuthi abafundi abadla lawa makhekhe baqala ukuziphatha ngendlela engajwayelekile abanye baqukela. Baphuthunyiswa esibhedlela iMalumulele lapho abathola ukwelashwa khona.
Abasolwa kubikwa ukuthi bazivumela bona kothisha ukuthi babadayisele ama-space muffin.
“Banabathengi ababhema insangu, ukuthi ngalalu suku badayisela abafundi abangayibhemi insangu amakhekhe anensangu ngephutha,” kusho omunye wothisha ocele ukungadalulwa.