ISuzuki Auto South Africa igudluze iVolkswagen Group Africa ngokuba yinkampani yesibili ukudayisa kakhulu eNingizimu Afrika, ngokwezibalo ezikhishwe yi-Naamsa.
Izibalo zango-Ephreli zikhomba ukuthi iToyota South Africa Motors (Tsam) isaqengqeleza phambili ngokudayisa izimoto ezintsha njengoba kuthengwe ezingu-8 541.
Endaweni yesibili kube yiSuzuki ngo-4 891. IVolkswagen (ehlanganisa iVW ne-Audi) isisendaweni yesithathu ngo-4 785.
I-Naamsa ithe isibalo sezimoto ezintsha ezidayise ngo-Ephreli sinyukile uma kuqhathaniswa nale nyanga nyakenye.
Lokhu ngokokuqala ezinyangeni eziyisishiyagalombili kulandelana ngoba izibalo bezehla uma kuqhathaniswa nesikhathi esifanayo ngonyaka odlule.
Zibe ngu-38 172 izimoto ezidayisiwe nokuyisibalo esinyuke ngo-814 noma u-2.2% uma kuqhathaniswa no-37 358 owadayiswa ngo-Ephreli 2023.
Isibalo sezimoto ezidayise ngaphandle sehle ngo-7 355 noma u-23.9%. Zibe ngu-23 394 ekubeni ngo-Ephreli wonyaka odlule zazingu-30 749.
Isikhulu se-Naamsa, uMikel Mabasa sithe u-2024 wunyaka obalulekile ngoba iNingizimu Afrika igubha iminyaka engu-100 kusuka yaqala ukwakha izimoto.
Uthe izomemezela ukuthi lokhu kuzogujwa kanjani ngokuhamba kwenyanga.
Nalu uhla lwezinkampani ezidayise kakhulu kuleli ngo-Ephreli:
Toyota – 8 541
Suzuki Auto – 4 891
Volkswagen Group – 4 758
Ford Motor Company – 2 614
Hyundai Auto South Africa – 2 134
Chery Auto South Africa – 2 009
Isuzu Motors South Africa – 1 540
GWM SA – 1 493
Nissan – 1 443
Renault – 1 307
BMW Group – 1 231
Kia South Africa – 1 003
Mahindra – 893
Mercedes-Benz SA – 562
Stellantis - 437