UKUCWILA ezikweletini ezagcina zifinyelela kuR1 million, okwamthatha cishe iminyaka emihlanu ukuzikhokha zonke, kwamvula amehlo uNksz Vangile Makwakwa, wakhuthala ngangakwenza ukusiza abanenkinga yezikweletu.
Uqale lapho ukuthekela ulwazi lokusiza ukugwema izikweletu, wabhala izincwadi ezintathu ezifundisa ngalokho; okungezithi Heart, Mind and Money ngo-2013, Next Level You: Womb and Money Journal ngo-2021, nethi Watch Your Money Personality: Changing The Way Black Families Manage Their Finances, ephume nyakenye.
Kuso leso sidididi, uqale nenkampani efundisa abantu ukonga nokuphatha kahle imali iWealth Money Academy, esebenza online ngezinhlelo zobuchwepheshe besimanje.
Elandisa ngohambo lwakhe lwezikweletu nokufundisa ngazo, uthe izinto eziningi zonakale ngenkathi esanda kuphothula i-degree yeBusiness Finance e-University of Cape Town ngo-2004.
“Kwathi ngelinye ilanga ngiyokhipha imali ebhange, kwangqwamba ikhadi lami emshinini, okwathi sengiyokwenza elisha ebhange, bangicebisa ukwenza ikhadi lokuthenga ngesikweletu, ngempela ngenza njengokuyalela kwabo ngoba ngibona ngathi lizongisiza, kanti sengizifaka emgibeni.
“Ngaqhubeka kanjalo ngithenga izinto ngamakhadi ezikweletu, ngivakasha nasemazweni omhlaba futhi ngahlala nasemazweni okukhona kuwona i-United Kingdom, South Korea, India, Sri Lanka, Thailand nase-USA lapho engenze khona izifundo zeMBA eSimmons School of Management ngo-2008,” usho kanje uNksz Makwakwa.
Uthe kufike lapho izikweletu zakhe seziningi kakhulu, engasakwazi ukuzikhokhela, okuphoqe ukuthi athole indlela angenza ngayo ukuzikhokhela zonke, okumthathe iminyaka emihlanu ukuziqeda.
“Ngiyakhumbula ukuthi sengiqala ukukhokha izikweletu zami, ngenza uhla lwazo zonke, ngaqala ngezincane kwaze kwafika kwesikhulu kunazo zonke. Lokho kwenza ngabona ukuthi baningi abanye abanale nkinga, okwenza ngihlale ngishisekela ukuthi ngibacebise ukukugwema, njengoba sekuphele iminyaka ewu-10 manje ngiphila impilo yokungabi nesikweletu. Konke ngikwenza ngemali yami, ngibala umuzi wami engihlala kuwona eKapa, nokuvakashela izindawo ezahlukene, ngibala amazwe ayisisishiyagalombili engaya kuwo ngo-2018, konke ngaphandle kwesikweletu,” kusho uNksz Makwakwa, odabuka eMpumalanga.