UHLABA ikhefu umdlalo iThe Wife, njengoba isizini yesibili izofinyelela emaphethelweni ngoMay 5.
Lo mdlalo odonse amehlo abantu abaningi kuleli uzokhuza ibuya ngesizini yesithathu ngasekupheleni kwalo nyaka.
UKevin Kriedemann weShowmax uthe okwamanje abakazi ukuthi isizini yesithathu izoqala nini, kodwa bazomemezela ekuhambeni kwesikhathi.
“Lo mdlalo uya ekhefini nje usanda kuqokwa emcimbini wezindondo amaDStv Mzansi Viewers' Choice Awards, lapho uqokwe khona eminxeni emine. Siyababongela abalingisi bawo, okukhona kubona uKwenzo Ngcobo oqokwe emkhakheni weRising Star, u-Abdul Khoza, noBonko Khoza abaqokwe emkhakheni weFavourite Actor noZikhona Sodlaka yena oqokwe emkhakheni weFavourite Actress,” kusho uKevin.
Uthe kulo mdlalo ababukeli bawo basanda kwamukela umlingisi uGaisang K Noge, olingisa indawo kaNaledi.
“Sizobasiza abantu ukuthi kwenzekani ngalo mdlalo kodwa esingakusho wukuthi kawuphelile, uthatha nje ikhefu lesikhashana, uyabuya nokuningi kuwona,” kuchaza yena.
Uthe ziningi izinhlelo zakuleli ezizoqala kwiShowmax ngenyanga ezayo, okukhona kuzona isizini yesihlanu yohlelo olukhombisa ngempilo kaSomizi, iLiving The Dream with Somizi.
Ezinye athe zikhona yimidlalo okukhona kuyona iWounds, Umkhokha, Last Blue Ride, Sex in Afrikaans neWelcome to the Family.
Uthe njengoba uhlelo iThe Real Housewives of Durban lufinyelele emaphethelweni ngesonto eledlule, kuzoba neziqephu zokugcina lapho abesifazane bezobheka emuva ezintweni ezenzekile ezizokhonjiswa ngoMeyi 6 noMeyi 13.